PSG neituten Spanish club neih tum

French club lar Paris Saint-Germain neitute chuan Spanish football pawh luhchilh tumin an thlithlai mek a, Spanish second division club Malaga chu neih ngei tumin hma an la mek.

PSG neitute hi Qatar Sports Investments (QSI) niin, an President Nasser Al-Khelaifi kaihhruaina hnuaiah infiamna khawvel an luhchilh thuk tawlh tawlh a, kalsan lam an rilruah a lang rih lo niin a lang.

QSI hian PSG bakah Portuguese club Braga-ah 22% neitu nihna an nei mek a, car intlansiakna Formula 1 team Audi leh NBA team Washington Wizards-ah te stake an nei bawk.

PSG neitute aiawha thupuangtu chuan, "QSI hian Europe leh America hmun hrang hrang an thlithlai mek a ni," a ti a, an club neitute chuan club thar neih belh tumin Europe bakah US thlenga an ngaihven thu a sawi.

QSI-in second division club daih an melh hian mak tih a hlawh a, chutihrual chuan Malaga hian mipui 30,000 lenna khelmual, La Rosaleda an nei a, 2030 World Cup thlenna tur khelmual zinga mi niin, hei hian QSI lam chil hi a tiput niin an sawi.

Malaga hi neitu pahnih awm mekin, Spanish hotel leh real estate group Blue Bay chuan 49% neiin, Qatari sumdawng hausa Abdullah Al Thani chuan 51% neitu nihna a nei thung.

Spanish club Malaga hian player langsar tak tak pawh lo kawl ve tawh ṭhinin, Argentina forward Javier Saviola, Brazilian player Júlio Baptista, Manchester United legend Ruud van Nistelrooy leh Paraguay player lar Roque Santa Cruz te an lo kawl tawh.

La Liga lamah hun rei tak an hman hnuin, kum 2018 khan second division lamah an relegate a, kum 2023 khan third division-ah an tla thla hial. Mahse, second division-ah kir leh tawhin, table-ah 15-na an ni mek a, relegation zone aṭanga an himna hi point sarih a ni.