De Kock-a'n KKR a chakpui

Indian Super League-ah Kolkata Knight Riders-in Rajasthan Royals chu Nilaini zan khan wicket riatin an hneh. Royals hian bat hmasain 151/9 runs chauh an siam a, KKR-in ball 15 dah bangin 153/2 runs siamin hnehna an chang.

Barsapara Stadium-ah Kolkata-in vawm hmasak an thlang a, an bowler-te an che ṭha bawk. An bowler panga Varun Chakravarthy (17/2), Moeen Ali (23/2), Vaibhav Arora (33/2), Harshit Rana (36/2) leh Spencer Johnson (42/1) ten wicket an la vek.

Royals tan Dhruv Jurel (33), Yashasvi Jaiswal (29) leh Riyan Parag (25) che chhe lo mah se chakna tham a ni pha lo a, 151/9 runs chauh an siam. KKR tan target a sang lo a, opener Quiton de Kock-a'n thi loin 97 runs a siam bakah ball 61 chauh a mamawh a, captain Ajinkya Rahane (18) leh Angkrish Raghuvanshi (22*) ten an hna a rawn thawh ṭhat bawk avangin 17.3 overs lekah 153/2 runs siamin hnehna an chang.

Zanin dar 7:30 hian MS Dhoni telna Chennai Super Kings leh Virat Kohli telna Royal Challengers Bengaluru te an ikhel dawn a, India captain hlui pahnih vang ringawt pawhin ngaihven a hlawh khawp ang.