Vawiinah Inter Dist Tourney hmawr bawkna

Reliance Naupang League pual Inter District Tournament chu March 25, Thawhlehni aṭang khan RG Stadium-ah khelh ṭan a ni a, vawiinah a hmawr bawkna neih a ni dawn. Inelna hi Under 12 leh Under 14-ah ṭhen hran a ni a, vawiinah semifinal leh final a awm ang.

Naupang League khelhna district pali Aizawl, Champhai, Lunglei leh Kolasib ten inelna hi an hmachhawn a, category pahnih Under 12 leh Under 14-ah district palite hian team hnih ṭheuh an tir. District tin champion bakah champion team-a tel lo aṭanga a ṭha thlan khawm Best of the Rest (BoR) an tel. Vawi khat ṭheuh an inkhelh chhuah hnua a sang paliin vawiin hian semifinal an khel dawn a ni.