Harsatna nei Raducanu a chak lo

Emma Raducanu tan Miami Open beiseina chu quarterfinal-ah a tawp leh ta - nimin zing khan British nula hi Jessica Pegula nen an inkhel a, harsatna a neih avangin enkawl lailawk a ngai hial a, inkhel zo tho mah se a chak lo zawkah a ṭang.

Kum 22 mi Raducanu hi a thaw a hah a, khaw lum a tuar hleithei lo - a taksa sa lutuk tih daihsak a ni a, match a khel zui leh bawk. Mahse, world number 4 Pegula lakah 6-4, 6-7 (3-7), 6-2 in a chak lo.

Armerican player zingah Pegula hi la dam awmchhun a ni a, darkar hnih leh minute 25 chhungin hnehna hi a chang - an inkhel a zawh meuh chuan, anmahni ramah zan dar 11:23 a ni tawh, mipa lama Novak Djokovic leh Sebastian Korda ten quarterfinal an khelh tur chu a hun sawn a ngaih phah hial.

Seeded palina Pegula chuan, "Inkhel hautak tak chu a ni a, a bik takin set hnihna kha a reiin a hauthlak hle. Set thumna kha a hma thei ang bera zawh ka tum a, mahse ka duh leh tum ang ngawtin a theih loh," tiin a sawi.

Kum 31 mi Pegula hian semifinal-ah chuan Alexandra Eala a hmachhawn leh ang. Philippines tleirawl Eala hi kum 19 mi chauh a la ni a, ani hian a match hmasa lamah Iga Swiatek a lo hneh tawh avangin zuam sual theih tur tak a ni ang.

Quarterfinal inkhel dangah Eala hian Swiatek hi 6-2, 7-5 in a hneh a, atan chuan Grand Slam vawi nga champion tawh hneh hi chanchin mak leh danglam bik a ni a, ṭha taka khelh chhunzawm a duh dawn.

Chak lo zawk Raducanu tan pawh lawmna tur a awm tho - US Open 2021 champion a nih hnuah beisei phak loin a awm reng a, hliam vangin a buai bawk. Tunah chuan player ṭha dangte elphak turin a ṭha tih a takin a lantir leh ta a ni.

Tun dinhmunah Raducanu hi world number 60 a ni a, inelna lian French Open leh Wimbledon an khelh hmain a ranking pawh a siam ṭha chho leh hman dawn niin a lang, chutihrualin hliam a neih loh a pawimawh dawn a ni.