LeBron James hoin Lakers chak ve leh ta

Tun hnaia che fuh hleithei lo Los Angeles Lakers chuan chak ni hmel an hmu ve leh ta, an thiampuipa LeBron James chuan hun pawimawh bikah basket neiin Indiana Pacers chu 120-119 in an hneh.

Nimin zing Indianapolis-a inkhelah team pahnih an inbei tawk hle a, hun tawp hma second 42 chauh awm tawhah James chuan point a sual chhuak a, player ṭha dang Luka Doncic-a'n remchang hlah thung mah se James-a hi Lakers chakna a ni.

NBA huanga player ropui berte zinga mi James hian Indiana Pacers lakah a tir lamah a khel ṭha bik lo, quarter hnuhnung berah point a nei ṭan chauh, mahse inkhel a zawh meuh chuan point 13 a neih bakah rebound vawi 13 bawk lain assist ṭum sarih a nei leh hman!

Lakers coach J.J. Redick chuan, "Player mak leh danglam a nihna chu a takin kan hmu leh ta. James hi chu basketball tana thilpek hlu tak mai a ni a, kan tan chauh ni loin NBA tan hian a hlu takzet.

"Match tir lamah duh ang takin che lo mah se, a hunah tak a rawn pen chhuak a, kan tan chuan ani kan nei hi a thlamuan thlak hle a ni," tiin a sawi a, point 34 neitu Doncic-a hnathawh chu sawi hmaih theih a ni lo tih a sawi bawk.

A zawna match thum an tlawm hnuah Lakers an chak ve leh ta a, NBA regular season kal laiah match 44 chak tawhin Western Conference table-ah palina an ni mek, vawi 28 ngawt an tlawm tawh avangin inchhuang thei erawh an ni bik lo.

Nimin zing inkhel dangah Washington Wizards pawh an chak, a zawna vawi nga an tlawm hnuah Philadelphia 76ers chu 119-114 in an hneh a; Toronto Raptors pawhin Brooklyn Nets 116-86 in an hneh bawk.

Nikola Jokic chu Denver Nuggets tan innghahna tlak a la ni zel a, point 39 ngawt neiin a team hi Milwaukee Bucks lakah 127-117 in a chakpui a, basketball inelna sangah hian ṭum 30 ngawt triple double a neihna ni turin rebound vawi 10 a lak zat chiah assist a nei bawk a ni.

Los Angeles Clippers chuan playoff an beiseina chhi nung turin New York Knicks 126-113 in an hneh a, point 14 ngawta hniam zawk lai nei mah se an tho chhuak a, a sang zual pariat zinga tel ngei an la beisei.

Team ṭha leh hmuhnawm Boston Celtics pawhin, a zawna vawi sarih an chakna ni turin Phoenix Suns chu 132-102 in an hneh, champion tura rinkai leh buk rit an ni chhunzawm zel.

NBA-ah hian team 30 an awm, conference pahnihah ṭhenhran an ni. Conference champion an zawn hnuah NBA champion an zawng leh ṭhin, table pahniha a sang zual pariat ten playoff (post season) an khel dawn a ni.