Lawson thlaktu Yuki Tsunoda

Formula 1 team ṭha Red Bull chuan an driver Liam Lawson aiah Yuki Tsunoda an hmang dawn tih an sawi chiang a, eng chena rei nge a nih dawn tih erawh an sawi tel lo chhung.

Sergio Perez thlaktu Lawson hian season kal laiah intlansiak vawi hnih a hmachhawn tawh, mahse beisei a phak lo. Red Bull chuan Max Verstappen-a teammate turin Tsunoda chungah rinna an nghat ta zawk.

Red Bull team principal Christian Horner chuan, "Intlansiak pahnih kan neih tawh te ngun takin kan thlir tir a, kan car RB21 hi Liam-a tan khalh a harsa, hmuh a hrehawm kan ti hle.

"Chuvangin kan zavaia kan ṭhat tlan zawkna tur a nih beiseiin thutlukna kan siam," a ti. Season hmasa khan Red Bull hian team championship lamah McLaren an tluk lo, an driver pakhat zawk Perez an mangṭha a, amah thlaktu tura an lakin beisei a phak lo a ni.

Tun season kal laiah pawh Red Bull hian McLaren leh Mercedes te an phak lo mek a, an ropuina ang nei let leh nghal turin thapui an thawh, kawng awlsam erawh a ni bik lo ang.

April 4-6 chhungin Japanese Grand Prix an tlan dawn - Japan rama intlansiak an neih hunah Lawson aiin Yuki Tsunoda an hmang ṭan nghal tawh dawn a ni.