Fils lakah Zverev a chak lo

Alexander Zverev tan duhthusam a thleng dik thei leh dawn ta rih lo, world ranking lama a elpui te an chet fih loh laiin ani pawh a che fuh thei ta bik lo - Miami Open last 16 paltlang zo loin a zinkawng a tawp.

Nimin zing inkhelah seeded pakhatna Zverev hi Arthur Fils lakah 3-6, 6-3, 6-4 in a chak lo a, kum 20 mi Fils hian a match lehpekah chuan Jakub Mensik a hmachhawn ang, anni pahnih hi Masters 1000 semifinal la thleng ngai lo an ni.

Fils hi a kum la naupang deuh mah se a hriam tawh hle, set hnihna an khelh lai pawhin 4-1 in a hnufual zawk; set khatna a hloh tawh bawk avangin a dinhmun a ṭha lo hle, chak lo tura ngaih a ni tawh.

Mahse, huaisen takin a bei let ngam, set hnuhnung berah pawh 3-1 in hnufual leh mah se a tho chhuak tho a, dinhmun hniam zawka ding chungin amah aia ranking sang leh tawnhriat ngah zawk a hneh let thei a ni.

Zverev a hneh hnuah Fils-a chuan, "Rei tak tak chhung ball inpek tawnah hian ka ṭha lo, tun ṭumah pawh khan ka ṭhat tawk lohna laiah hian beih ka ni, mahse harsa tak chungin ka khelh dan phungah ka kir thei thung.

"A hmasa berah chuan service ṭhat a pawimawh, service hmasa ber a kal dik tawh hi chuan kawng a awlsam phah ṭhin," a ti a, an match khelh leh turah pawh service a pawimawh dawn tih a sawi bawk.

Quarterfinal inkhel dangah Grigor Dimitrov chuan Francisco Cerundolo chu 6-7 (6/8), 6-4, 7-6 (7/3) in a hneh a, set khatna hloh mah se a hnuhnung pahnihah chuan kum 33 mi Dimitrov a tho chhuak a ni.