Naupang football thiam ber district Mamit

MFA Inter District Junior Boys Football Championship final-ah Mamit-in Lawngtlai 4-1 in an hneh a, an champion. Mamit hian Lawngtlai hi group stage-ah 3-0 ngawtin hneh lo mah se a pawimawh hunah tak an chak.

Nimin inkhelah pawh hian team pahnih an inhnehtawk a, Lawngtlai keeper-in box pawn chiahah goal tura ngaih a dan avangin hnawhchhuah a ni a, Mamit midfielder Malsawmdawngliana'n freekick hi goal-ah a chantir.

First half-ah vek Kenedy Laihlunsanga hmangin Lawngtlaiin siphurh an sut. Mahse, second half-ah Mamit-in an tamna an hmang ṭangkai a, second half-ah Joel Lalhriatdika, leh Lalruathlua ten an khung belh hnuin best player-a thlan Malsawmdawngkima'n injury time-ah a khung belh.

Mamit coach Lalchhandama (Chd Tlau) chuan, "Khelo India academy kan neih hi kan chhawr ṭangkai a, artificial turf-ah kan practice thei tawh a, min pui hleah ka ngai bawk," tiin Vanglaini a hrilh a, a naute inlungrualna a fak bawk.