Champion tum Barcelona an chak leh ta

Hansi Flick-a enkawl Barcelona-in La Liga nomawi chawi an tum tih an pholang a, an mikhual Osasuna chu 3-0 ngawtin an sawp–Ferran Torres, Dani Olmo leh Robert Lewandowski ten goal khat ṭheuh an khung a, Barca an chak.

Barcelona-in hnehna an chang a, La Liga table chung ber an luah chhunzawm zel. Catalan club hian match 28 an khelh aṭangin point 63 an nei tawh a, Flick-a naute hi uang thei erawh an la ni lo.

Catalan club hnaih bertu Real Madrid chuan Barca hi point thum chauhin an phak lo mek a, pathumna Atletico Madrid pawhin beisei an la nei - match 10 khelh tur la awmah point sarih chauhin Barca hi an thlau.

Goal thum chu

Barcelona khelmualah Catalan club-in goal khung turin hun an mamawh rei lo. Minute 11-na lekah Ferran Torres chuan Alex Balde-a cross aṭanga ball kal chu a tlawh lut a, tun season-a goal 14 a khungna chiah niin, a career-a season khata goal a khung tam ber record a siam der.

Barca hian an duhtawk mai lo. Minute 21-naah Dani Olmo chuan penalty a hlawh chhuak a, aman a pet nghal. Olmo penalty pet hi goalkeeper Sergio Herrera chuan dang zet mah se, Osasuna player an lo tlan lut hma hret a, pet ṭhattir a nih hnuah Olmo-a'n a hlah nawn tawh lo.

Catalan club hian 2-0 a hmahruai chungin chawlhlawk an hmang a, minute 77-naah an belhchhah zui. Substitute Robert Lewandowski chuan an goal thumna hi a khung a, tun season inelna hrang hrangah match 41 khelin goal 36 a khungna chiah a ni.

Lawm lohna

Barcelona-in kar laklawha match an neih bik chhan hi an team doctor Carles Minarro Garcia thih vang a ni a, March 8 khan team pahnih hi intawng tura tih ni mah se, Carles-a thihna avangin inkhelh theih a ni lo.

Mahse, Barca hi inkhelhtir an nih hunah an lawm lo hle – international break tawp atanga ni khatnaah chiah inkhelhtir an ni a, player-te an hah hle. Player chhuanvawr Raphinha phei chu Brazil tan a feh chhuah avangin Osasuna a inlan hman lo hial.

France tana feh chhuak, Barca defender Jules Kounde chuan, "Kan inkhelh ni tura an ruahman hi en ila, eng ang club tan pawh inzah lohna angah ka ngai. Club mai bakah player zah lohna pawh a ni tel a, khawl kan ni bik lo tih an hriat a ngai," a ti a, a ṭawng na hle.

Buai mai thei...

Barcelona an chak lo a, Osasuna an lungawi loh avangin Catalan club an hek mai thei - Barca hian an defender Inigo Martinez chu Osasuna lakah chhawrin, minute 90 an khelh tluantir.

Inigo hian international break-ah khan Spain kohna hnarin, hliam vanga national team camp a zawm theih loh thu a sawi–a hnu lawkah a inkhel leh si! FIFA danah chuan player chu national team squad aṭanga a inhnukdawk a nih chuan, a hnu ni nga chhungin club tan a inlan thiang lo.

Hetihrual hian FIFA danah vek, player chu national federation phalna thlapa inhnukdawk a nih chuan inlan phalsak a ni. Inigo hian Spanish football federation phalna a lo nei lo a nih chuan, Catalan club hi hrem theih dinhmunah an ding mek tihna a ni.