Napoli mualah AC Milan

Pathianni zan dar 12:15 hian Napoli chuan Serie A match pawimawh khel turin AC Milan an lo mikhual dawn - Italian champion nih tuma tlan mek Antonio Conte leh a naute ten point thum hmuh a pawimawh ang.

Nipui bazar lai khan Conte hi Juventus nen sawizawm a ni a, mahse Napoli a pan - Naples club hi zawimuangin a siamṭha a, tunah chuan champion lai Inter Milan el buai phak bertu an ni mek.

Tun hnai khan Italian chanchinbu ṭhenkhat chian Conte hi AC Milan manager thar tur anga sawi an awm. Mahse, Milan hi an coach Sergio Conceicao nen an la inṭhen loh bakah season laklawh lai a ni a, thuchiang engmah a awm lo.

Italian manager Conte hian nimin tlai thleng kha chuan a hma hun engmah a la sawi duh lo, tuna a enkawl lai Napoli bak ngaihtuah a nei lo tih chu a hmain a lo sawi tawh a, zaninah pawh an mikhual lakah ṭhat an chhuah a rinawm loh a ni.

Serie A hmahruaitu Inter Milan chu zanin hian an inlan dawn thung, dar 9:30-ah Udinese an mikhual dawn - Simone Inzaghi naute hian hnehna an chang a nih chuan Napoli an lo kalsan hret thei rih ang.