PSG an champion thei tawh dawn?

Paris Saint Germain chuan Ligue 1 nomawi an chawi teuh tawh hle, tun kar tawpah hian champion theih dan kawng an nei - zanin dar 11:30 hian Saint-Etienne an lenchilh dawn a ni.

Luis Enrique enkawl PSG tan champion turin Saint-Etienne hneh ringawt a tawk lo, anmahni hnaih bertu Marseille chu Reims lakah an tlawm tel ve thung a ngai, midang result an la ngaihchan tel a ngai dawn.

Ligue 1 match khelh hmabak pariat an la nei a, hmahruaitu PSG hi pahnihna Marseille aiin point 19 ngawtin an sang fal - zaninah Marseille an inlan hmasa dawn, season hmasa ang bawk khan Reims mualah an tlawm a nih chuan PSG tan kawng an hawng dawn a ni.

Nipui bazar lai khan Kylian Mbappe chuan Paris club chhuahsanin Real Madrid a zawm a, an player ṭha ber a chhuah avang hian tlahniam deuh duai tura ngaih an ni a, mahse chutiang ngawt chu a ni hauh lo.

PSG hi Ligue 1 season kal laiah an la tlawm miah lo! Mbappe awm lai pawha an la tih theih ngai loh an ti mek, league chauh ni loin Champions League lamah pawh result an nei ṭha, quarterfinal an inhlangkai tawh bawk a ni.