Djokovic-a'n semifinal a lut

Novak Djokovic chuan nimin zing khan Sebastian Korda hnehin Miami Open semifinal a lut a, an inkhelh hun pangngai an sawn avangin tunkin hian match a khelh zui leh nghal a ngai dawn a ni.

World number 5 Djokovic hian American tlangval Korda lakah an duh ang thlapin a khel thei bik lo, set hnihna an khelh lai phei chuan hniam zawk ṭum pawh a nei, mahse a tawpah erawh 6-3, 7-6 (7-4) in a chak.

Djokovic hi kum 37 mi a ni tawh a, Grand Slam dawta inelna ngaihhlut Masters 1000 tournament bikah chuan semifinal lut thei upa ber a ni, champion thei upa ber nihna a chelh thei mek bawk.

Hard Rock Stadium-a inkhelah Djokovic hian ṭantu a nei ṭha hle, tennis a khelh hun chhunga nomawi 100 chawi tling thei dinhmunah a ding mek a, atana mellung pawimawh phun turin match pahnihah hnehna chan a la ngai tihna a ni.

Quarterfinal inkhel dangah Jakub Mensik chuan seeded 17-na Arthur Fils chu 7-6 (7-5), 6-1 in a hneh a, seeded pathumna Taylor Fritz pawhin Matteo Berrettini chu 7-5, 6-7 (7/9), 7-5 in a hneh ve bawk.