Man City tan nomawi beisei tur a awm

FA Cup quarterfinal chu zanin aṭangin khelh ṭan a ni dawn a, team pariat la dam zingah Manchester City hming a lian. Pep Guardiola hote hian zanin dar 9:00 hian Bournemouth hmachhawn turin Vitality Stadium an tlawh ang. City-in season an hmang chhia a, Premier League-ah champion beiseina nei tawh loin Champions League-ah an tla tawh mah se FA Cup-ah champion rinkai an ni.

Pep Guardiola-a'n English club a zawm hnuah Premier League nomawi vawi ruk a chawi tawh a, League Cup nomawi vawi li chawi tawhin FA Cup erawh vawi hnih chiah a la chawi thung. Man City tan kumin hi champion-na hun ṭha niin a lang a, chutihrualin khelh fuh loh ṭum an neih ṭhin avangin Bournemouth lakah pawh chesual thei an ni.

Premier League-ah Man City hian match 29 aṭangin point 48 an hmu a, Bournemouth nen point li chauhin an inthlau a, indahsang thei an ni lo. Vitality Stadium-ah nikum November 2 khan an inhmachhawn tawh a, Cherries hi 2-1 in an chak. Andoni Iraola hote hian City hi hneh ngei an tum dawn a, Man City ai mahin nomawi chawi an châk zawk dawn.

Cherries tan Justin Kluivert-a'n inelna hrang hrangah goal 13 a khung tawh a, Dango Ouattara leh Antoine Semenyo ten goal kua khung ve vein City tlarhnung tan hnawksak thei an ni.