Chanmari an ṭang thei, hahdam thei an la ni lo

I League 2-ah I League khelh tuma inum boruak a 'hot' zel. Inrinni khan Chanmari FC-in FC Bengaluru United 1-0 in an hneh a, an elpui Sporting Clube de Goa pawhin United Sports Club 2-0 in an hneh ve bawk. Nimin khan Diamond Harbour-in Neroca 2-0 in an hneh a, I League khel tur a la chiang thei lo.

Diamond Harbour, Chanmari FC leh Sporting Clube de Goa ten hmun ruak pahnih an inchuh dawn. Table thlirin Kolkata club leh Mizo club dinhmun ṭha angin lang mah se Goan club hi match khatin an khel tlem tih hriat a ṭha.

Goal khungtu FC-a

Chanmari FC-in thla khat tling lo hret an zinchhuah hnuah Inrinni khan FC Bengaluru an mikhual a, March thla tira RG Stadium-a an inkhel nen a danglam ta hle. Mizo player-te an zin chau tih a hriat a, player pawimawh Paul Ramfangzauva leh KC Malsawmsanga inhliam bakah Lalhmangaihsanga (Papuia) hrem an tuar tih a lang bawk.

Mizo club hian Vincent Lalduhawma hmangin chance nei hma mah se goal an khung lo a, coach Nallappan Mohanraj-a'n tlarhnungah player panga a rem bakah defensive game a khelhtir avangin Chanmariin chance ṭha insiam an harsat.

Second half-ah Lalrokima a rawn lut a, Lengpui tlangval rawn luh hnuah inkhel a nung sawt. Ephraim Lalremtluanga ball pet thiamna hmuhin a awm a, a ball pet hmasak keeper Manjunat Hirekurbar-a'n dang mah se a cross ball ṭha zet erawh an dang thei ta lo. Minute 68-naah Ephraim-a cross chu Lalruatsanga'n tiperin FC-a'n huaisen takin a tauh lut.

Bengaluru United-in goal an chhuah hnuah attacking football an khel a, Mizo club an buai. Bengaluru captain Biydyananda Singh a hmuhnawm a, ball semtu chauh ni loin goal hmaah pah a hlauhawm a, crossbar a pet per. Chutihrualin hun tawp lama Moses Lalrinzuala ball rawn khalh vel a hmuhnawm viau a, hun khawhral nan a pawimawh hle.

Chanmari keeper Zothanmawia pawhin goal theihna tura ngaihah Bengaluru forward chu box pawnah a titlu a, yellow card a hmu. Tun season-a la inlan kim vek keeper T. Mawia hi hrem vangin April 3, Ningania SAT Tirur an tlawh hunah a inlan thei lo ang.

Engtin zel?

Hmahruaitu Diamond Harbour hian United Sports Club (A), Sat Tirur (A), Chanmari FC (A) leh FC Bengaluru United (H) te an la hmachhawn dawn. Mizo club tibuai theitu bera ngaih Sporting Clube de Goa hian Trau (A), Neroca (A), FC Bengaluru United (A) leh Sat Tirur (H) te an la hmachhawn dawn.

Chhiarkawp dan ang thlapa Chanmari FC tana I League khel tur chuan point ruk hmuh a la ngai a, head to head-a Sporting Clube de Goa an tluk loh avangin point nga a tawk lo. Mizo club hian Sat Tirur, Diamond Harbour leh Klasa an la hmachhawn dawn a, point kaw hmuh theih aṭanga point ruk hmuh chu thil awlsam a ni lo.