jose Mourinho-a'n ngaihdam a dil
Tottenham Hotspur manager Jose Mourinho chuan coronavirus vanga social-distancing guideline siam a zawm lo tih a pawm a, Portuguese coach chuan sorkar dan zawmte chu an tih tur a nih thu a sawi zui.
Chelsea boss hlui hian a midfielder Tanguy Ndombele chu London-a park pakhat Hadley Common-ah training a neihpui a, he video hi social media lamah a darh zui.
Spurs player dang Davinson Sanchez leh Ryan Sessegnon-te chu park-ah hian an training ve tho tih hmuh a ni bawk a, Serge Aurier chuan instagram lamah an training lai video a tarlang bawk!
Mourinho chuan, "Sorkar dan kan zawm lo tih ka pawm a, inchhung khura kan chenpuite nen ngei chauh kan awmho tur a ni tih hi ka pawm thlap. Sorkar thu chhuak zawm a, theihtawp chhuaha nun chhanhim tuma hnathawkte thlawp hi kan tih tur a ni tih ka hria," tiin a sawi zui a, a inthiam lo.
Spurs pawhin thuchhuah siam nghalin an player-te chu social distancing ngai pawimawh tura an hriat nawntir thu an sawi a, London khawpui mayor Sadiq Khan chuan Mourinho leh a player-te chet dan chu a dem thu a sawi ve bawk.