Miami Open champion Sabalenka

Hmeichhe tennis world number 1 Aryna Sabalenka chuan Jessica Pegula hnehin Miami Open nomawi a chawi a, tun season kal laiah title pahnih a lakna a nih bakah world ranking a sang ber a nihna a sawhnghet.

Nimin zing khan Hard Rock Stadium-ah a hmawr bawkna neih niin, seeded pakhatna Sabalenka hian Jessica Pegula chu 7-5, 6-2 in a hneh a, straight hmanga chak ni mah se awlsam taka chak erawh a ni bik lo.

Set khatna an khelh laiin an service an inchhuhsak tawn a, player pahnihten an inchhuhsak zat hi vawi sarih ngawt a tling - set hnuhnung zawkah erawh Belarus star hi a talbuai duh tawh lo, game hnih chauh hloh chungin a chak tlang.

Kum 26 mi Sabalenka chuan, "Sawi vak tur pawh ka hre lo, hlawhchhamna ka chan hnu lawkah lawmna ka tawng ve leh ta. Thawhrimna rah chu a hluin a thlum bik ṭhin tih chu a takin kan hmu," tiin a sawi.

January thla khan Brisbane International-ah Sabalenka hi a champion a, mahse a hnuah Australian Open leh Indian Wells lamah final lut mah se a chak lo zawkah a ṭang - Madison Keys leh Mirra Andreeva te a hneh lo.

A vawi khat nana Miami Open champion Sabalenka chuan, "Point tin mai kha ka tan a pawimawh vek a, vawi khat tihsualin nghawng a neih natzia leh a pawi thuizia pawh ka hrefiah chiang hle.

"He hmunah hian min thlawptu an ṭha em em a, chung mite avang chuan inkhelh nuam pawh ka ti. Ruah surin min ti buai lo a, a hunah tak kan khel pangngai thei - ka champion avang hian keimah chauh ni loin tennis ngainatute pawh an lawm," a ti.

Nizan khan mipa final khelh zui leh nghal a ni a, seeded palina Novak Djokovic leh Jakub Mensík ten nomawi an inchuh a, result erawh kan hre hman lo. Serbian star Djokovic a champion a nih chuan, kumin atana a title hmasa ber leh tennis a khelh hun chhunga nomawi 100 a chawi tlinna a ni ang.