PSG-in nomawi an khawih phak ta

Paris Saint-Germain chuan an kut ding lamin Ligue 1 nomawi an chawi tawh a, an kut pahniha chawi fel turin point khat chauh an mamawh tawh - a zawna a vawi li nan an champion ngei dawn niin a lang ta.

Inrinni zan Ligue 1 inkhelah PSG chuan Saint-Etienne chu 6-1 in an sawp a, league match khelh hmabak pasarih la awmah anmahni hnaih bertu Marseille aiin point 21 tehmeuhin an sang fal tawh a ni.

Tlak hlau lakah Paris club hian zahngaihna an lantir lo - goal phur hmasa zauh mah sen Goncalo Ramos chuan penalty aṭangin a sut, chumi hnuah Khvicha Kvarstskhelia, Joao Neves leh Ibrahim Mbaye ten goal khat ṭheuh an khung a, Desire Doue chuan goal hnih a khung thung.

PSG coach Luis Enrique chuan, "Champion kan nihna hi hun rei tak aṭang khan ka pawm tawh, a chhan chu season tir aṭang khan team ṭha ber kan nih vang a ni a, nomawi chu a nemnghehna tur chauh a ni tawh ang," tiin a sawi.

Kylian Mbappe chhuak mah se PSG an buai lo - Enrique naute hian league match 27 an khelh tawh chinah an tlawm miah lo a, hneh loh nei loin an champion ngei dawn niin a lang, tlawm loin season an hmang tluan thei ang em tih erawh hriat a la ni lo.