Manager thar hnuaiah Juventus an chak

Igor Tudor-a'n a team thar Juventus a kaihruai ṭan a, an mikhual Genoa chu 1-0 in an hneh - goal awmchhun hi minute 25-naa Kenan Yildiz khung a ni a, mualneitu lamin point thum an hmuh nan a tawk.

Hmanni lawk khan Old Lady hian an manager Thiago Motta an ban, a hmun ruakah Tudor an lalut nghal - Croatian manager tan bul ṭanna ṭha a ni a, chutihrualin hna hmabak erawh an nei hautak chho dawn a ni.

Serie A table-a pangana Juve manager Tudor chuan, "A bul ṭan ṭhat kha kan tum tak a ni a, a tir aṭangin na takin goal kan nawr a, vawi khat chauh khung mah ila keimahni lam kan inveng thei kha a lawmawm," tiin a sawi.

Inrinni zan Serie A inkhel dangah AS Roma chuan hun tawp dawna Artem Dovbyk-a goal khung hmangin Lecce chu 1-0 in an hneh a, league match 30 aṭanga point 52 hmuin paruknaah an awm ve thung a ni.