Forest an kal zel

Season duhawm tak hmangtu Nottingham Forest chuan Premier League-a an chet ṭhat chu tihpalh thil a ni lo tih an pholang zel a, FA Cup-ah pawh semifinal an lut der!

Forest hian Inrinni zan khan Brighton & Hove Albion chu khualmualah lenchilhin, 0-0 in an inhnehtawk a, penalty-ah 4-3 in an chak zui - kum 1991 hnua FA Cup semifinal an luh leh hmasak ber a ni!

Nuno Espirito Santo enkawl Forest hian international break-a inhliam Chris Wood tel loin Brighton an hmachhawn a, club top scorer tel loin tlarhma a hriam tawk lo a, Brighton an ropui bik lo.

Minute 64-naah Forest hian penalty an hlawh chhuak a, Kaoru Mitoma chuan Elliot Anderson titluin, referee Peter Banks chuan penalty spot a kawk. Mahse, video assistant referee a inrawlh a, referee hian penalty a pek sa a 'cancel'.

Team pahnihin minute 120 chhung goal an khung lo zui a, penalty an pet - Forest tan Neco Williams tih loh zawngin an chhuih luh laiin, Brighton tan Jack Hinshelwood leh Diego Gomez ten an hlah.

Hun pangngaia Gomez-a khung ngei tura lang ṭha zeta dangtu, Forest keeper Matz Sels chuan penalty-ah pawh Gomez a dang a, Hinshelwood-a pet a dang bawk a, Forest a chakpui.

Quarterfinal inkhel dangah Crystal Palace chuan 3-0 in Fulham an hneh a, Eberechi Eze, Ismaïla Sarr leh Eddie Nketiah te chuan goal khat ṭheuh khungin, mualneitu Fulham-in a chhanletna tur an nei lo.

Nizan khen FA Cup quarterfinal dangah Preston North End leh Aston Villa inkhelin, Manchester City-in Bournemouth an lenchilh bawk a, an result kan hre hman lo.