Saints player-ten hlawh la rih dawn lo
Premier League club Southampton chuan June thla thleng an player-ten hlawh an lak rih loh tur thu an sawi a, player bakah hian coaching staff leh club borad of director-te chuan an hlawh an la dawn rih lo a ni.
Coronavirus hri leng vangin Premier League club tam tak sum lamah an talbuai a, club-ten sum lama harsatna an tawhte chingfel turin theihtawpin hma an la mek.
Saints hian an hmalakna chu an hnuaia hnathawk, non-playing staff-ten an hlawh 100% an lak theihna tur atana tih a nih thu an sawi a, hlawh tlem zawk ten hlawh an lak theih nan a chunglamin hlawh an la dawn rih lo a ni.
Southampton chuan sorkar scheme hnuaia 80% hlawh, non-playing staff-ten an lak theihna dan chu April, May leh June atan chuan an zawm loh phawt tur thu an sawi a, Covid-19 in zia lam a pan loa league an khel chhunzawm lawk thei lo a nih erawh chuan he scheme hi an hman ve ngei pawh a la ngai mai thei.
Premier League club-te chuan tun hnaiah khan player-te chu an hlawh 30% tihniam turin an lo ngen tawh a, mahse Professional Footballers' Association chuan hlawh tihhniam chuan an chhiah pekah nghawng a neih dawn avangin a ṭha lo an tih thu an sawi a, an duh lo.
PFA ngaihdanah chuan hlawh tih tlem hian an chhiah pek a tlem sawt ang a, chu chu NHS-in a tuar thei dawn a ni. Hetihrual hian Premier League player-te hian an theihna zawnah hma lak tumin theihtawp an chhuah tho a, #PlayersTogether tih hmangin Covid-19 do nan sum an thawhkhawm dawn a ni.