Premier League squad hlut zawng a tlahniam
Football statistics website lar transfermarkt-in a zirchianna aṭanga a lan danin Premier League-a club 20 squad hlutna chu pound tluklehdingawn 1.6 zetin a tlahniam a, Manchester City chu squad hlutna hloh nasa ber niin pound maktaduai 225-in an tlahniam! Player-te hlut zawng a tlakhniam vak chhan hi coronavirus hri leng vang a ni a, he hri leng hian football khawvela sumdawnna chu na taka a nghawng avangin hei hian player hlut zawng a khawih tel lo thei lo.
Hlutna tehna
Player-te hlut zawng teh nan hian transfermarkt chuan statistics hrang hrang zingah player-te kum zat, contract rei zawng leh an club khelh mekna an zawm dawna an man zat chu an hmang a, hei hi uluk taka zirchianna nei lehin an hlut zawng tur chu an chhut chhuak ṭhin.
Transfermarkt chuan coronavirus hri lengin football khawvel a nghawng dan a en a, club tam takin sum an hloh nasat avangin an player duh ngei pawh an lei ngam an ring lo - hei vang tak hian player hlutna hi a tlahniam lo thei ta lo a ni.
Hlutna kiamna
Hetiang a nih tak avang hian transfermarkt chuan player-te hlutna hi kum 1998 hma lama piangte chu 20% in a tih hniamsak a, 1998 hnu lama piang te hlutna chu 10% a tih hniam a ni thung.
Player hlutna teh nan transfermarkt chuan kum a ngai pawimawh a, chumi awmzia chu club zingah kum 22 chung lam player langsar kawl an tam chuan an squad hlutna hi rin aia sangin a tlahniam thei dawn tihna a ni.
Player tlahniam
Manchester City forward Raheem Sterling chu Premier League-a player hlu berah ngaih a la ni cheu a, a hlutna hi pound maktaduai 115 vel la nia ngaih a ni - heti chung hian hlutna tlahniam nasa ber player a ni thung a, a hlutna tlakhniamna hi pound maktaduai 29 a tling.
Premier League player langsar dang Kevin de Bruyne, Harry Kane, Mohamed Salah leh Sadio Mane te hlutna pawh a tlahniam nasa a, anni hlutna hi pound maktaduai 108-ah ṭheuh chhutsak niin an hlutna tlakhniamna hi pound maktaduai 27 ṭheuh a ni.
City sanna!
Manchester City squad hlut zawng chu pound maktaduai 224 ngawtin a tlahniam a, an hnuai chiahah hian pound maktaduai 205-a player-te hlutna tlahniam Liverpool an awm ve leh thung.
Spurs chu pathumnaah awmin an player-te hlutna tlakhniamna belhkhawm chu pound maktaduai 148 a tling a, player hlutna tlahniam tlem ber Norwich City player-te hlutna tlakhniamna chu pound maktaduai 21 lek a ni - hei hi an player neih hlut zingah kum 22 hnuai lam Todd Cantwell, Max Aarons, Ben Godfrey leh Jamal Lewis te an awm vang a ni.
Tak tak ni maw?
Player-te hlutna tlahniamin, Covid-19 hian transfer bazar a nghawng tak tak ang em? tih chu zawhna awm thei a ni a, a chhanna hnaivai ber chu, "Nghawng ang," tih hi a ni bawk - sum lakluh a hniam phah miau a!
Transfermarkt chuan football khawvela mi thiam bik 300 zet a rawn a, heng zinga 30% chuan transfer bazar-ah Covid-19 in nghawng a neih ngei an rin thu an sawi a, transfermarkt neitu Matthias Seidel chuan, "Tuna kan dinhmun thlir chuan transfer bazar nghawng lo tura ngaih hi thil harsa tak a ni," tiin a sawi.