October-ah F1 an beisei
Formula 1 season ṭan theih a la ni rih lo a, coronavirus vanga tih khawtlai zel a la ni. F1 managing director Ross Brawn-a chuan inelna hi October thla velah an neih theih a beisei thu a sawi.
Brawn-a hian car intlansiakna sang ber hi entu awm lo pawha tlan a ngai mai thei tih a sawi a, an hmabaka tih tur awm reng reng chu uluk leh fimkhur taka an tih tur thu a sawi tel bawk.
Ruahman dan hmasaah chuan inelna hi March thla tir aṭnga neih tur kha a ni. Mahse, khawvel pumah Covid-19 avangin infiamna a kal mumal thei rih lo a, intlansiak pasarih chu a hun sawn tawh niin, pakhat chu tun season atan ṭhulh tawp a ni hial.
F1 managing director Ross Brawn chuan, "Season hman hram kan duh a, engtik hun hi nge a ṭan theih hun tlai ber tia min zawh chuan, a chhanna chu October a ni ang. Chumi hnu lama season ṭan leh hnuhnawh chuan buaina kan insiam mai mai zawk thei.
"Chutihrualin inelna hi nakkum thlenga neih chhunzawm tur ang pawhin a ruahman theih tho bawk. January thla kan thleng a nih chuan beisei aia tam intlansiak kan nei thei ang," tiin beiseina dang pawh an neih thu a sawi.
Formula 1 hi an dan leh hraiah world championship nei tur chuan a tlem berah intlansiak pariat tal a awm a ngai. Brawn chuan, "Hun harsa leh khirhkhan tak a ni a, inelna hi inhnaihchilh tak taka kan neih pawh a ngaih hmel.
"Team leh F1 thuneitu lam chuan practice hun kan neih tih tlem pawh a thuphung chuan kan remti tawh a, inelna neih zat tur leh a hun hi chu tih chian theih a la ni lo, inelna neih hmabak ṭhenkhat pawh a hun sawn leh thut theih reng a la ni," a ti.