NorthEast United pet chhuaktu Khalid-a JFC

I League-a ropui taka Aizawl FC lo champion pui tawhtu Khalid Jamil a kal zel - Pathianni zan khan ISL playoff-ah Jamshedpur FC chu hnehna a chanpui a, NorthEast United chu 2-0 in an hneh.

JFC tan Stephen Eze leh Javi Hernandez ten goal khat ve ve an khung a, Highlander-in Shillong khawpuiah fans ngah zawk an nihna an chhawr thei lo.

Jamshedpur-in ISL semifinal an lut a, league round champion Mohun Bagan an hmachhawn ang - semifinal lehlamah Bengaluru leh FC Goa an inkhel thung ang.

Kha le Eze

Highlander-in goal khung turin hun an mamawh rei lo. Minute 29-naah Aizawl FC fullback hlui Ashutosh Mehta-a 'throw-in' chu Stephen Eze ke bulah a tla a, Nigria tana vawi 13 inlan thei centre back hian goal-ah a chantir.

JFC tan kum 20 mi Mohammed Sanan chuan chance ṭha nei mah se, a khung lo a, Buanthanglun Samte pawhin Highlander tan hming chherna remchang nei mah se, Aizawl FC keeper hlui Albino Gomes a paltlang thei lo.

NorthEast United hian Shillong-ah 70% zet ball changin, vawi 21 ngawt shot nei mah se, a pawimawh ber goal an khung thei lo - vawi thum chiah target zawnah shot an nei thei.

A tawp kharna

Minute 88-naah Highlander beiseina chhit nunin a awm a, JFC midfielder Mobashir Rahman chu hnawhchhuah a ni. Mahse, NorthEast lamin a tam zawk an nih an chhawr thei lo a, JFC bawkin goal an khung nawn!

Hun pek belh minute kuanaah Ritwik Das leh Javi Hernandez ten magic an 'show' a, mawi zeta ball an inpek kual hnuah Javi hian a hmar bawkin, chak nemnghehna goal a khung.

NorthEast-in goal hmaa an hriam tawk loh an tuar a, Macarton Louis Nickson, Nestor Albiach, Alaaeddine Ajaraie, Jithin MS leh Parthib Gogoi ten an chance neih an chhawr theih loh chu an ui vawng vawng ang.

Khalid-a lawmna

Tun dinhmunah Khalid Jamil aia Indian coach ṭha an awm kher lo ang - I League-a Aizawl FC tana nomawi a chawi hnuah ISL thlengin hming a chher chhunzawm a, Highlander semifinal a hruai thleng hnuah Jamshedpur a hruai thleng ve leh ta.

Indian coach zinga ISL club coach hmasa ber Khalid chuan, "Kan tan chuan result duhawm tak a ni a, hetiang result nei tur hian ka player-te an thawkrim hle - vawiina kan result hi anmahni vanga nei thei kan ni," a ti.

Highlander coach coach Juan Pedro Benali chuan, "A chang chuan football kheltu zawk kan tlawm a, kan khelh chhiat zawk changa chak pawh kan nei ve tho bawk. Hei hi football chu a ni tih kan pawm a, inti chak a, hmalam kan thlir a ngai a ni," a ti a, chak phu zawk an chak loh thu a sawi.