Man City nomawi beiseina a la nung

FA Cup-ah Manchester City chuan Bournemouth lakah goal chhuah hmasa mah se Erling Haaland leh Omar Marmoush te goal hmangin an lehthal a, 2-1 in an chak. City hian semifinal-ah Premier League-a an ngam loh Nottingham Forest an hmachhawn dawn a, Aston Villa leh Crystal Palace te an inkhel bawk ang.

Vitality Stadium-ah City-in bul an ṭan chhe lo a, mahse Bernardo Silva penalty hlawhchhuah chu Erling Haaland-a'n a khung lo. Norwegian striker hian a football career-ah penalty vawi riat a hlah tawh a, FA Cup-ah bik chuan a vawi khat hlahna niin Premier League-ah vawi hnih a hlah tawh bawk.

Haaland hian chance ṭha dang pawh a hlah a, Cherries erawhin hun ṭha an bawhpelh ve lo. Justin Kluivert-a thawhrah chu Evanilson-a'n minute 21-naah a khung. Second half-ah erawh team ṭha zawk City dan reng theih an ni lo a, Haaland pawh chelh reng thei a ni ta lo.

Minute 49-naah bench aṭanga rawn lut Nico O'Reilly siam chu Haaland-a'n a khung. Minute 61-naah Marmoush a rawn lut a, Egyptian forward hian hnih hnuah a khung nghal - O'Reilly siamsak tho a ni. Pep-a'n substitution awmze nei a siam zarah 2-1 in hnehna an chang a, an chet chhiat season-ah nomawi chawi thei dinhmunah an ding.