Madrid Open-ah Murray leh Kerber
Covid-19 vangin tennis season kal laiah clay court leh grass court inelna a awm thei lo a, master tournament zinga pakhat Madrid Open chuan tun thla tawp lam hian video games hmangin inelna a siam dawn.
Online video games khel tur zingah hian Andy Murray leh Angelique Kerber te chuan hming an pe lut ve leh ta, world number 1 Novak Djokovic leh Rafael Nadal te pawhin an khelh tur thu an sawi chiang tawh.
Games aṭanga an sum hmuh chhuahte hi coronavirus vanga harsatna tawkte ṭanpuina tur a ni a, inelna hi April 27-30 chhunga neih tur niin player-te hian an inkhelhnaah hian pawisa an inchawi ang a, chumi hmang chuan sum an tuak ang.
Grand Slam vawi thum champion tawh Kerber chuan, "Mahni chenna in aṭangin player dangte nen kan inkhel dawn a ni a, a nuam dangdai khawp ang, tun hma lama thil la thleng ngai lo a ni. Ṭha taka ka khelh theih nan ka inbuatsiah dawn," a ti.
Tennis inelna hi March thlatir lam aṭang khan chawlh lailawk vek a ni a, tuna beisei dan chuan July thla chawhnu lamah inelna neih leh theih beisei a ni. Mahse hei pawh hi hri leng a ziaawm viau a nih ngawt loh chuan chawlh chhunzawm theih a la ni.