Real tlansanin a chung berah Barcelona

Spanish La Liga-ah champion tum inum boruak a 'hot' chho zel a, Inrinni zanah Real Madrid-in Barcelona nih rual zuai mah se, an hlim chhung a rei lo - Pathianni zan khan Catalan club an chak ve lehnghal a, table chung ber an luah.

Barcelona hian an mikhual Girona chu 4-1 ngawtin an sawp a, Robert Lewandowski chuan goal hnih khungin, Ladislav Krejci (own goal) leh Ferran Torres ten goal khat ve ve an khung bawk.

Girona tan Arnaut Danjuma chuan goal khung ve mah se, mualpho zualpui khuhna chauh a chang a, Barca an chak chiang. Hansi Flick-a naute table chung berah an awm chhunzawm a, pahnihna Real Madrid aiin point thumin an sang leh ta.

Barca an phur

Inkhel ṭantir aṭangin Barcelona-in inkhel an thunun nghal a, Fermin Lopez leh Lewandowski ten Girona keeper Paulo Gazzaniga an enchhin nghal a, thilmak danglam tak a thleng zui.

Lopez hian freekick a hlawh chhuak a, mahse, video assistant referee (VAR) in penalty a nihna chance a awm avangin ennawn turin a ti a, referee erawhin VAR a en hnuah Girona zawk freekick a pe daih!

Jules Kounde-a goal khung pawh offside vangin pawm a ni lo a, Barca hi dan reng theih erawh an ni lo. Minute 43-naa Lamine Yamal-a freekick chu Girona defender Ladislav Krejcí chuan an lamah a tilut.

Goal a sur

First half-ah goal khat chiah a lut a, second half-ah goal li a lut thung! Barca rin loh takin Girona-in si phurh an sut a, Dutch forward Danjuma chuan minute 53-naah keeper Wojciech Szczesny dan rual lohin a khung.

Barca erawh an buai phah lo. Striker chhuanvawr Robert Lewandowski a inlar a, Polish forward ṭha mi hian minute 80 pawh a ral hmain goal hnih a rawn khung - chak tur a chiang tiin a sawi theih.

Mahse, Barca-in an duhtawk lo. Hun tawp nan minute li chauh a awm tawh tihah Torres a inlar ve leh a, season duhawm tak hmangtu hian tun season-a a goal 15-na khungin, an chak a nemnghet.

A hming Lewy

Kum 36 mi Lewandowski-a'n goal khung a la bansan thei lo a, tun season inelna hrang hrangah match 42 khelin goal 38 a khung tling ta der a, assist vawi thum a nei tel bawk.

Lewy chuan, "Mi tam takin ka kum chungchang an sawi ka hria a, mahse, kum 21 mi lek ka nih laia ka thawhrim ang khan ka la thawkrim reng a, season tam tak inkhelh ka la duh," a ti hem mai.

Polish striker chuan, "Ka taksa a la in fit tawk a, ka goal khung zat hi en ula, a la danglam lo," a ti a, kum upatin amahah nghawng a neih loh thu a sawi - Lewy hi La Liga-ah goal 25 khungin top scorer a ni mek a, amah hnaih bertu Kylian Mbappé chuan goal 22 a khung tawh.