Marquez chetsual niah Bagnaia a chak!

MotoGP inelna Grand Prix of the Americas tlan zawh takah Francesco Bagnaia a tlan chak ber a, season bul ṭan ṭha tak Marc Marquez erawh a tlan tluan ve thei ta lo a ni.

Spanish rider Marquez chu lap kuana an tlan laiin tlankawng sir lamah a chhuak a, hemi remchangah hian Bagnaia chu rawn dawk chhuakin tun season atan bik a vawi khat nan hnehna a chang.

Italian rider Bagnaia chuan, “Ka tan chuan he hnehna hi hlimna sang tak min thlen tirtu a ni a, hun harsa leh khirh tak tak ka tawh hnuah ka chak ve leh ta chiah, ka chhinchhiah reng tawh ang,” tiin a sawi.

Tun season intlansiak an neih hmasakah te Marquez a chungnung ṭhin hle. Thailand leh Argentina GP-ah te khan intlansiak pangngai bakah Sprint Race-ah te a chak a, mahse tun ṭumah hian point a hlawh chhuah tak loh avangin rider championship lamah pawh pahnihnaah a tla hniam nghal.

Austin, Texas-a intlansiakah hian Alex Marquez chu pahnihnaah a thleng a, championship table lamah a u Marquez lehpelin a chung berah a kaisang a, an unau hian champion an inchuh chho dawn niin a lang.

Marc Marquez chuan, “A nihna takah chuan thil kha harsa tur angin a lang lo, mahse intlansiak nuam leh awlsam tak tur anga langah khan ka chesual tlat si a ni. Bike intlansiak hi chu rinlawk thiam vek hi a harsa, hei tak hi a nawmna leh hrehawmna a ni tel bawk,” tiin a sawi.

Alex-a hian point 87 a hmu a, a u Marc Marquez chuan point 86 hmuin pathumna Bagnaia chuan point 75 a hmu thung, an inthlauhna a zim em avangin intlansiak vawi khat lekah an dinhmun a danglam nghal thei zel dawn a ni.

Khawvela bike intlansiakna sang ber MotoGP hi tun season atan vawi thum an tlan tawh. Intlansiak palina ni turin April 13, Pathianni hian Lusail International Circuit-ah Qatar Grand Prix an tlan leh ang.