City Ground-ah Man United lenglut dawn

Manchester United-in zanin dar 12:30 hian City Ground-ah tun season hmang ṭha Nottingham Forest an tlawh dawn a, Ruben Amorim-a hoten March thlaa an chet ṭhat chhunzawm an tum dawn a ni.

Amorim-a hote hian an match hnuhnung berah Leicester City chu 3-0 in an hneh a, kumina a vawi khat nan Rasmus Hojlund-a'n goal hmahruai a khung. Danish striker hian ram tan goal a khung zui a, Parken stadium-a Denmark leh Portugal inkhelh ṭumah goal awmchhun a khung. Bruno Fernandes leh Alejandro Garnacho te an khel ṭha chhunzawm a nih chuan City Ground-ah point hlawhchhuah an inbeisei ang.

Man United-in hliam vangin Amad, Lisandro Martinez, Kobbie Mainoo leh Luke Shaw te chhawr thei dawn lo mah se Leny Yoro a rawn kir theih a rinawm tawh a, Patrick Dorgu-a'n hremna a hmang zo tawh. Rawlthar duhawm Ayden Heaven pawhin training zawm tawh mah se a khelh aiin a khelh loh a rinawm zawk.

December thla khan Man United hian Forest hi Old Trafford-ah 3-2 in an hneh lo a, khami ṭum khan 'upset' a ngaitu awm bawk mah se table-a an dinhmun thlir chuan 'upset' a ni lo. Mahse, an intawn hnuhnung bera chakna goal khungtu Chris Wood chu ram tana a inlan ṭumin a inhliam a, zanin pawh inlan lo thei dinhmunah a ding.

Nuno Espirito Santo hote hi match li chhung chu an chak zawn tawh a, City Ground-ah hian champion tum Arsenal nen pawh an inhnehtawk. Forest hian season thara Champions League khelh ngei an tum avangin Man United lakah hian point khat ni loin point thum hmuh an tum dawn. Callum Hudson-Odoi leh Anthony Elanga te chu United tlarhnung tan buaina tham a tling ang.