Online hmangin Milan Derby!
Covid-19 chuan thil thleng pangngai sa a chawlhtir ṭhuap a, tun hma lama la thleng ngai lo a thlentir fo thung. AC Milan leh Inter Milan pawhin a vawi khat nan online games hmangin vawiin tlai dar 4:00 hian 'Milan Derby' an khel dawn.
European League lian dangte ang bawkin Serie A chu hri leng vangin khelh theih a ni lo. Italy hi coronavirus kai leh thi tamna hmun a ni - Milan club pahnih ten games an khelh tur hi ṭanpui ngaite tana pawisa tuakna tur a ni ang.
Tunlaia online game lar tak pakhat Pro Evolution Soccer 2020-ah Milan derby hi an khel dawn. Milan tan Portuguese forward Rafael Leao chu khel tur niin, Inter striker Sebastiano Esposito nen an inhmachhawn dawn a ni.
Kum 20 mi Leao chuan, "Khelmual chhungah taksa hmangin kan inkhel thei rih lo a, tun ṭuma kan thil tih tur hi chu a danglam dawn hle. Inter nena inhmachhawn tur kan nih avangin eng pawh ni se hnehna chan ka tum," tiin a sawi.
Tun ṭuma an games khelh tur hi AC Milan fans lamin ṭanpui ngaite an puihna kawnga an hmalakna chi khat a ni a, player pahnih hian match an neih hmain thuthar thehdarhtute an hmachhawn ve thlap.