Hertha Berlin coach thar Labbadia
Bundesliga club Hertha Berlin chuan Ningani zan khan Bruno Labbadia chu an coach thar a nih thu an puang a, manager kal chhuak ta Jurgen Klinsmann hmun ruak a luah ang; a contrat rei zawng hi chiang taka tarlan ni lo mah se media lam chuan kum 2022 thleng niin an ziak.
Club sporting director Michael Preetz chuan, "Bruno hi player a nih lai aṭanga kan hriat tawh a ni a, chumi hnuah coach ni chunga a hna thawh kan hre leh bawk, a chungah rinna kan nghat thlap," tiin an coach thar chungchang a sawi.
Kum 2019 November thla khan Berlin hian an manager atan Klinsmann an lalut, mahse beisei ang result an nei thei lo. German manager hian February thla khan Facebook kaltlangin a hna a chawlhsan thu hi a puang.
A hmun ruak hi hnawhkhah nghal mai a ni lo a, hri leng vanga inkhel a awm loh zui avangin an hnawhkhat har deuh ni pawhin a lang. Tunah chuan coach thar Labbadia kaihhruaina hnuaiah season neih ṭan leh hun atan training an nei dawn.