Ibiza lakah Barcelona an vannei

Coach thar Quique Setien hnuaiah Barcelona-in third division club hneh turin vanneihna an mamawh a, injury time-a Antoine Griezmann goal hmangin UD Ibiza chu 2-1 in an hneh. 

Copa del Rey round of 32 inkhelah Ibiza hian minute kuana lekah goal hmahruai an khung a, Antoine Griezmann chuan second half-ah goal hnih hmangin a chhanglet a ni. Nilaini zan inkhel dangah Real Madrid chuan 3-1 in Unionistas an hneh ve bawk a, Gareth Bale chuan September hnua a vawi khat nan Spanish club tan goal a khung ve leh ta. 

Bale bakah hian Juan Gongora (own goal) leh midfielder Brahim Diaz te chuan goal khat ve ve an khung bawk a, Unionistas tana Alvaro Romero goal khungin awmzia a nei lo. 

Ibiza khelmualah Barcelona-in an thiampuipa Lionel Messi leh defender pawimawh Gerard Pique te an hruai tel lo a, hetichung hian harsatna nei loa chak mai tura ngaih an ni - third division club an tum miau a, a awm lo hran lo. 

Mahse, Barcelona-in rin loh takin goal an chhuah hmasa zawk a, midfielder Javi Perez shot chuan winger Pep Caballe perin minute kuana lekah goal hmahruai an rawn khung - Ibiza players an sapatal a, an tan chuan mumang ang mai a ni. 

Catalan club-in inkhelh chhung zawngin 78% zet ball chang mah se an beisei goal an hlawh chhuak thei lawk lo a, minute 72-na an nghah thlen a ngai.

Ibiza fan-te mumang rama an leng lai chu Griezmann-a'n a beng harh a, French striker hian si phurh sutna goal a rawn khung. Hun pek belh minute linaah chakna goal a khung zui a, Barca an vannei - Ibiza an vanduai. 

Kum 2015-a an khaw club tihtawp tawh UD Ibiza-Eivissa dinthar leh nana din UD Ibiza hi club president Amadeo Salvo sum hmanga intung nung ve mai an ni a, kum thum chhungin vawi hnih ngawt promotion an hmu. 

Spanish third division table-ah pathumna an ni mek a, match 21-ah point 43 nei tawhin an chunga awm team pahnih an thlauhna hi point hnih chiah a ni - hmahruaitu hi Atletico Madrid B team an ni! Ibiza khelmual Can Misses stadium-ah hian mipui 4,500 bak an leng lo a, Barcelona an mikhualna inkhelah erawh ticket 6,445 hralhchhuakin stadium-ah an inhnawhkhawm. 

Khelmualah hian phul lem (artificial turf) hman a nih avangin Barcelona player-ten khelh an harsat tih a hriat a, Ibiza coach hi Barca player hlui Pablo Alfaro a ni bawk - Alfaro hi Racing Santander-ah Barca coach Setien nen kum thum chhung an khel dun hman!

September 1, 2019 khan Gareth Bale-a'n Villarreal lakah goal hnih a khung a, mahse hemi hnuah hian Spanish club lian tan goal a khung leh tawh lo!

Nilaini zanah he record duhawm lo hi Bale-a'n a thai bo a, third division club Unionistas lakah miniute 18-na lekah goal hmahruai a khung. Mahse, Copa del Rey round of 32-a Real an hmachhawn dawn avanga hlim em em Unionistas hian minute 57-naah an chhanglet. 

Bench aṭanga luhtir Alvaro Romero chuan a ke vei lam hmangin goal chung kil sirah a thlawh lut a, goal mawi zinga chhiar tel tlak a ni - Real hlauhthawn nan erawh a tling zo lo. Unionistas left back Juan Gongora chuan an lamah a ti goal palh a, Manchester City midfielder hlui Brahim Diaz chuan injury time-ah khung belh lehin Madrid khaw club hi 3-1 in an chak.