Galacticos - Real Madrid hmelhmang thlaktu
Florentino Perez-a president-na hnuaiah Real Madrid-in kum 2000 chho khan sum ṭhahnem tak sengin team an din a, he team hi Galacticos an tih chu a ni. Los Blancos hian tun hmain manto takin Alfredo Di Stefano, Ferenc Puskss, Raymond Kopa, Jose Santamaria leh Francisco Gento ta an lalut a, hei hi a bul ṭannaah a ngaih theih.
Real Madrid hian Stefano, Puskas leh Gento te ho hian kum nga chhung tawp a zawnin European Cup (Champions League) an chawi a, tun hnu thlenga an ropuina chhan pakhat a ni. Amaherawhchu, 1956 aṭanga 1960 thleng European Cup an chawi hnuah 1966-ah champion lehin an reh zui ta vang vang a, 1998 khan Predrag Mijatovic goal hmanga Juventus hnehin an champion leh chauh. Kum 2000-ah Vicente del Bosque kaihhruaina hnuaiah Champions League-ah an champion leh a, Galacticos tih an la ni lo.
Kum 2000 hian Real Madrid president thlanna a awm a, 1998 leh 2000-a Champions League nomawi an chawi avangin Lorenzo Sanz chu tling nawn tura ngaih a ni a. Sanz chuhpuitu Fiorentino-a'n campaign au hla ṭha tak a nei thung. Perez hian sum lama Los Blancos harsatna te pholangin thlan tlin a nih chuan an hmelma Barcelona aṭangin Luis Figo lak a tiam.
Florentino Perez chu Real Madrid president atan thlan tlin a ni a, a thutiam angin khawvel player manto ber ni turin Figo chu an hmelma Barca aṭangin kum 2000 khan euro maktaduai 60-in an lalut. Kum khat hnuah transfer record siam lehin Zinedine Zidane chu euro 73.5 in an lalut a, player langsar dang Ronaldo (Brazil), David Beckham leh Michael Owen te an la zui a. Kum 2004-a president thlan a nih meuh chuan Perez hian vote awm zawng zawng aṭanga 94.2% a chang.
Galacticos hmasa hi Figo an lak kum 2000 ṭanga Beckham-a chhuah kum 2007 chhungah a chhiar theih a; 2000-01, 2002-03 leh 2006–07 khan La Liga nomawi chawi mah se Champions League-ah erawh kum 2002-ah chauh an champion. Hemi ṭum hian Zinedine Zidane chuan mawi fahranin a pet goal.
Real Madrid hian player lak nana sum hman tam hi an uar chhunzawm a; Kaka, Karim Benzema, Cristiano Ronaldo, Xabi Alonso, Angel di Maria, Luka Modric, Gareth Bale, Toni Kroos leh James Rodriguez te manto takin an la a, hei hi Galacticos pahnihna tihin an sawi theih. Tun ṭumah erawh Galacticos hming rawn larchhuah tak hi kan thlur bing ang.