Coronavirus lockdown Galacticos ho video call hmangin an inbia

Brazilian Ronaldo 'the phenomenon' biakte hi David Beckham, Luis Figo, Roberto Carlos leh  Iker Casillas te an ni hlawm a, mimal tin pawha chanchin ngaihnawm tak nei vek an nih avangin an inbiakna hi a ngaihnawm hle.

David Beckham hian kum 2003-2007 chhung Real Madrid tan a khel a, La Liga leh Spanish Super Cup nomawi pakhat ve ve a chawi. Freekick pet thiam hmingthang Beckham chuan, "Nang (Ronaldo) leh Roberto Carlos ten English player zingah Brazil tana khel phak an awm a nih chuan keimah (Beckham) ka nih thu min hrilh kha ka la hre reng," tiin an ti tinaah a sawi.

Inngaitlawm takin Beckham chuan, "In thusawi kha ka pawm ngai lo, a chhan chu Brazilian player ho chu khawvela ṭha ber te in ni," tiin a sawi zui a. Ronaldo chuan, "Khawvel midfielder ṭha ber zinga mi i ni. Ball i khawih dan te, i duhna hmun takah ball i pet thei a, keimah pawh min en ngai lo. Ka tlan a, ka bulah ball a lo kal ṭhin," tiin Beckham chu hmai chhanah a fak.

Florentino Perez-a'n president hna a chelh hmain Roberto Carlos-a'n Real Madrid a zawm tawh a, Los Blancos hi La Liga nomawi pali leh Champions League nomawi pathum a chawipui. Carlos hi 1996 aṭanga 2007 thleng Madrid-ah a awm a, player langsar tak tak nena a khelho thei hi vannei a inti hle.

Ball pet nat vanga lar Carlos leh Ronaldo hian kum 2002 khan Brazil chu FIFA World Cup-ah an champion pui a, Real Madrid-a an khelh dun lai hian Spanish league-ah 2003 leh 2007 khan an champion. Carlos chuan, "Player ṭha dang nena kan hun a inrual kha ka vannei a, kan khel ho thei kha a lawmawm hle. Covid-19 vangin harsatna tam tak kan tawk a, mi tam takin nunna an chan a, Lorenzo Sanz pawhin nunna chan," tiin March thlaa Covid-19 vanga thi Real Madrid president hlui Lorenzo Sanz chungchang a sawi. Sanz hi 1995-2000 chhung khan Real Madrid-ah president hna a chelh a ni.

Ronaldo ang thoin Luis Figo-a'n Barcelona leh Real Madrid tan a khel a, Portuguese star erawh a vanglai taka Madrid pan a nih avangin huat a hlawh hle. Kum 2000-a Perez-a'n president hna a chelh chiah khan Real-in pound maktaduai 37-in Figo hi an lalut a, a hunlai chuan an leina pawisa hi a tam hle. Tun hnuah erawh player man a san nasat avangin a lang tam lo a, a tawi zawngin Cristiano Ronaldo-a'n Manchester United aṭanga Real Madrid a pan ai khan a boruak a sang zawk.

Figo-a'n Real tana a khelh kum hnihnaah pawh Nou Camp-a El Clasico an khelh ṭumin Barca fan thinrimin khelmualah vawk lu an vawm lut. Ronaldo leh Figo te erawhin club pahnih inkar lam an sawi lang lo. Figo chuan, "Kan hun hmanho ṭhin kha a hlu a, player-te kha mi hriat hlawh ni hlawm mah ila kan tihturah kan chiang. Kan thawrimna zarah hun duhawm kan chang nual reng a ni," tiin a sawi.

Figo hian Real Madrid hi 2001 leh 2003 khan La Liga-ah a champion pui a, kum 2002-ah Champions League nomawi chawiin Spanish Super Cup-ah vawi li a champion bawk.

Iker Casillas hi Real Madrid chhul chhuak a ni a, kum 1997-2016 inkar khan Spanish club tan khelin club legend a ni. Spain keeper hlui hian Los Blancos hi La Liga panga, Champions League pathum, Spanish Cup pahnih, Spanish Super Cup pali, FIFA Club World Cup pahnih, Inter Continental Cup pathum leh UEFA Super Cup pahnihah a champion pui.

Kum 38 mi Casillas hian nikum khan Porto tana a training laiin heart attack a nei a, tun ṭumah hian hemi chungchang hi a sawi. Casillas chuan, "Training pitch-a a thleng kha ka vannei a, ka nunna an chhan theih phah," tiin thi thei dinhmuna a din thu a sawi.

Ronaldo chuan, "Kum tam tak chhung hliam vangin ka buai a, World Cup leh Real Madrid khan nun nawmna min pe," tiin hliam vanga a nih tur ang a nih loh thu a sawi chhuak. Brazil striker hlui Inter Milan-a a khelh laiin khup hliamin a tibuai nasa hle.

Casillas chuan, "Real Madrid tana i rawn khel kha kan tan vanneihna a ni a, mi zawng zawng tan hriatreng tlak sulhnu i hnutchhiah. Kan hun tawn kha hun duhawm tak a ni," tiin Real Madrid vanglai a ngaihhlut thu a sawi chhuak.