Sharda University MSL X Zaninah league round khel zo dawn

Mizorama basketball inelna sang ber leh ngaihhlut hlawh, Sharda University Mizoram Super League X-a league round match hnuhnung ber chu zanin hian khelh a ni dawn.

Tlai dar 5:30-ah Zarkawt BCA leh Zemabawk BC an inkhel dawn a, tun season MSL-a club hmuhnawm pahnih hi tla thei dinhmunah an la ding ve ve - nizan lama inkhel pahnih result-ah club pahnih an la innghat tel bawk.

A tawi zawnga sawi chuan club pahnih tan chak mai hi buaina chinfelna awlsam ber a ni a, a chak zawkin MSL top four an khel dawn chiang. Tarlang tawh ṭhin angin tun season MSL-a top four hnuai lam zawngin relegation playoff an khelh a ṭul dawn a, top four nih hi kum dang zawng aiin a hlu lehzual hle.

MSL champion ngun ber Zarkawt BCA hian beisei angin season bul an ṭan lo a, an league match hmasa pahnihah Chanmari BC leh Khatla TBL ngam loin an tlawm - tunah erawh insiamṭha leh tawhin, match li a zawnin an chak tawh.

BCA tan Marquis Cunningham a hmuhnawm ṭhin a, Lalrina Renthlei a la rintlak reng a, Lalnunpuia Renthlei leh Zonunsanga te an chet ṭhat bawk chuan Zemabawk tan BCA laka hnehna hlado chham a harsa ang.

Zemabawk BC hi MSL kai thar ni mah se, beisei phak baka ṭhain season an hmang a, BCA hian an zuam a nih chuan an tisual ang - match ruk an khelh tawhah vawi li an chak a, vawi hnih an tlawm.

Hetihrual hian Zemabawk hian an match hnuhnung berah Saron BC an ngam lo a, insiamṭhat an mamawh - Kenneth J. Perkins Jr. leh Nitish Beniwal neitu an ni a, tualchhung player Lalrozama leh Vanlalrinchhana an rintlak ṭhin bawk avangin BCA laka chak tum ngam tur an ni.