Haaland out, Marmoush tan hun ṭha

Premier League champion lai Manchester City tan nomawi humhim theih a ni tawh lo a, season thara Champions League khelh chu an hmachhawn lian ber a ni. Pep Guardiola hote hian zanin dar 12:15 hian relegation zone-a awm Leicester City an mikhual ang.

City hian an player pawimawh bera chhal theih Rodri an chan tawh a, kartawpa FA Cup inkhelah Erling Haaland a inhliam avangin zaninah pawh a inlan thei dawn lo. Pep-a hoten goal khungtu an mamawh a, January thlaa an lakluh Omar Marmoush chu mamawh chhanna a ni thei ang.

Norwegian striker Halaand hian Man City-in Bournemouth 2-1 a an hneh ṭumin siphurh sutna goal a khung a, minute 61-naah ke rek hliam vangin thlak a ni. Thawhṭanni khan Haaland dinhmun hi endik a ni a, club lam chuan season tawp lama a rawn let theih an beisei.

Pep-a'n Rodri tel loa khelh dan a thiam hleithei lo a, January thlaa a player leite a hmang thiam dawn chauha a lan laiin Haaland a inhliam. City meuh pawh season tawpa a sang pali zinga awm lo thei dinhmunah an ding a, tunah pawh panganaah an awm mek. Norwegian striker hian tun season match 40 aṭangin goal 30 a khung tawh a, thlak zawh a har dawn.

Chutihrualin City hian January thla khan £59mtd sengin Eintracht Frankfurt aṭangin Marmoush an lalut a, Egyptian forward hian beisei pha chiah lo mah se Premier League match sarih aṭangin goal li a khung tawh. Inelna hrang hrang match 11 aṭangin goal nga a khung tawh bawk.

Haaland a awm loh chuan Marmoush hian hmun pawimawh a chang dawn a, Leicester City tlarhnung tan ven tham a tling ang. City-in beisei an phak loh ang thoin Premier League champion tawh Leicester City pawh an che chhia a, tla ngei tura ngaih an ni. Ruud van Nistelrooy hote hian chak dan an theihnghilh tawh a, Premier League hnuhnung 15-ah vawi 13 chak loin vawi khat chiah an chak.