Atletico khelmualah Barca

Spanish football-a club inelna ngaihhlut hlawh, Copa del Rey semifinal second leg chu zanin dar 1:00 hian khelh a ni dawn - Atletico Madrid khelmualah Barcelona an lenglut ang.

Barca khelmuala first leg khelh a nih ṭumin team pahnih hi 4-4 in an inhnehtawk a, zaninah pawh inkhel hmuhnawm tak an chhawpchhuak leh tura ngaih a ni - Spanish Cup-ah away goal rule a awm tawh lo.

Nizan khan semifinal lehlamah Real Madrid chuan Real Sociedad an mikhual bawk a, result kan hre hman lo - inkhel hmasa zawkah Real hi 1-0 in an lo chak tawh thung.

Kha la Barca

Hansi Flick-a enkawlna hnuaiah Barcelona an vul mek a, La Liga-ah hmahruaitu niin, Champions League quarterfinal an lut tawh a, Supercopa de Espana nomawi an kawl ran tawh bawk.

Copa del Rey-ah pawh champion nomawi chawi an duh dawn a, chumi tur chuan season hmang ṭha em em mai Robert Lewandowski, Raphinha leh Lamine Yamal te hoin tlarhma lamah mawhphurhna an lak a ṭul dawn.

Atletico hi tlarhnung lam khawng ṭhat avanga fak hlawh ṭhin an ni a, mahse, Barca hi first leg-a goal li khung theitu an ni. Atletico hmaa an match hnuhnung berah 4-1 in Girona an sawp bawk a, an inringtawk khawp ang.

Chak mamawh Atletico

Team pahnihin chak mamawh ve ve mah se, a mamawh zawk thlang dawnin Atletico Madrid kan thlang kherin a rinawm! A chhan maw? Champions League last 16 aṭanga petchhuah an ni a, La Liga-ah lah hmahruaitu Barca hi point kuain an phak lo bawk.

A tawi zawnga sawi chuan Atletico tan Copa del Rey hi tun season-a nomawi an beisei theih chhun ang hiala chhal theih a ni tawh a, an hmelma Barca hneh chung ngeia an ti thei a nih chuan an lawm a zual ang.

An beiseina a tam ram a chan nan erawh Julian Alvarez leh Antoine Griezmann an pawimawh dawn a, tlarhnungah Espanyol nen 1-1 a an inhnehtawk ṭuma lakchhuah ngai Robin Le Normand hi a inlan thei lo a nih chuan chânna a tling dawn thung.