Villa tan ṭan chhan la awm

Aston Villa-in Champions League quarterfinal an lut tawh a, FA Cup semifinal an thleng leh tawh bawk. Unai Emery hoten Premier League-ah khelh chhan an la nei a, table-ah pakuanaah awm mah se palina Chelsea nen an inthlauhna chu point li chauh a ni.

Zanin dar 12:15 hian Villa-in Brighton an tlawh dawn a, Emery hote tan hna a awlsam dawn lo. Seagulls hi table-ah pasarihna an ni a, kartawp khan FA Cup-ah Nottingham Forest hneh lo mah se an chak lohna hi penalty shootout niin vanduai vangah a ngaih theih.

Brighton boss Fabian Hurzeler chuan, "Tun hi kan chak lohna aṭanga thawhchhuahna hun ṭha a ni a, theihtawp kan chhuah ang. Kan tan palinaa awm theihna remchang a ni a, a sang pali zinga kan awm a nih pawhin mak ka ti lo. Sum hman tur ngah lo mah ila, palina zinga awm phak turin kan ṭha ve tawk a ni," tiin a sawi.

Seagulls tan pawh a awlsam bik lo. Villa tan January thlaa loan hmanga lakluh Marcus Rashford leh Marco Asensio te club thar tan an che ṭha a, Brighton tlarhnung tan ven tham an ni ang.