Djokovic a tlu - Tho leh thei tak ang maw?

Player ṭha bik a ni a, a bik takin set nga khelh a tlin a, tie-break te chu midang aia a ṭhat zualna emaw tih mai tur a ni ṭhin. Mahse, tun hnaiah Novak Djokovic chuan heng a nihna te hi a hloh mek a, a vanglai sawi dawn chuan tunhma lam hret sawi a ngai ta.

Serbian star hian inkhelh a la chawlhsan lo a, mellung pawimawh leh hlu bik phun thei dinhmunah a la ding, tennis a khelh hun chhunga nomawi 100 chawi tling turin pakhat a la hmabak, mahse nikum aṭang khan a la nghak chhuak thei rih lo a ni.

A upa ta

Djokovic hi kum 37 mi a ni tawh - May 22 a lo thlen chuan kum 38 a tling ang, a kum ngaihtuah chuan tennis khelh chawlhsan pawh ni se a awm tawh viau a, amaherawhchu a la chawl mai bik lo.

Inelna a hmachhawn hnuhnung ber Miami Masters khelh zawh takah khan final a lut a, Grand Slam dawta inelna ngaihhlut Masters 1000 huanga final lut thei upa ber a ni hial, mahse champion tak chu a harsa tawh.

Nomawi inchuhna inkhelah Jakub Mensik a hneh lo, a ngam loh hi kum 19 mi chauh a ni. Inkhelh laiin Djokovic hian a mit (eye) lamah harsatna a nei niin a hriat a, mahse Serbian star chuan chhuanlam tur a ni lo niin a sawi.

Djokovic chuan, "Ka khingpui khan a khel ṭha em em a, chak phu zawk pawh a ni. Chuvangin ka tan chhuanlam siam tur a awm lo, inkhelah chuan a ṭha leh chak phu zawkin hnehna an chang mai ṭhin," tiin a khingpui a dahsang thiam hle.

Pathianni zana final khelh tur kha ruah sur vangin darkar ruk deuh thaw an ti khawtlai a, hei vang hian hun tam tak an khawhral. Inkhelh ṭan hma aṭangin Djokovic hi a nih tur ang takin a ni lo tih chu a lang, kum tam tawh lamah chuan thil a awlsam lo a ni.

Mensik nen khan tie break an khelh pahnih a la lo! Tun hnai chawlhkar 52 chhungin tie break a khelh 10 zinga panga chauh a la thei, tun hma lama a ṭhat bikna ngeiah pawh midangin an ngam ta viau, a tan hun tawp lam a hnai tih a chiang.

A sang tawk

Grand Slam vawi khat champion nih pawh a harsa, an ngaihhlutzia hriat theihna chu major title pathum latu Andy Murray chu British sorkar chuan 'Sir' nihna an pe - Djokovic chu vawi 24 tehmeuh a champion! Ani aia champion tam reng reng mipa player dang an awm lo.

Inkhel tawh loin chawl tawh pawh ni se la Djokovic thlen chin hi a sangin a ṭha tawk a, midang tana khum leh mai mai theih tawh loh tur thil a ni. Major title lak tam lama amah hnaih bertu Rafael Nadal chu vawi 22 a champion, ani chuan inkhelh a chawlhsan tawh.

Tuna player inkhel mek zingah Carlos Alcaraz chu Grand Slam vawi li champion tawh a ni a, a dawtah vawi thum champion Jannik Sinner a awm bawk; anni pahnih dinhmun aṭanga thlir chuan Djokovic awmna hi a la sang lutuk a, ban phak rual a ni lo.

Kumina Grand Slam hmasa ber Australian Open an khelh ṭum khan Djokovic hi a inlan, mahse hliam vangin a khel tluan thei lo. Sulhnu a neih ṭhatna hmun kha ui tak chungin a kalsan a ngai a, tuna a lan dan chuan season tharah a khel leh thei ang em tih chu zawhna lian tak a ni.

Coach atan Andy Murray a la a, training chu a nei ṭha a ni mai thei; mahse tournament pangngai an khelh chinah an beisei ang thil a la thleng lo. Murray hi inkhelh chawlhsan hlim mai a ni, player enkawl lamah sulhnu a la nei tam lo thung.

Beiseina chu

Novak Djokovi hi a ṭha tawk tiin sawi dawn ta ila, inelna a hmachhawn hnuhnung berah final a la lut thei bawk si, player dang ten an tih theih loh chu a la ti thei tlat. Tun hma lam boruak a phak ta lo deuh a nih pawhin, tunlai a ṭha tam tak zingah a la ṭha bik.

World number 5 Djokovic chuan, "Miami Open khan thil tam tak mi zirtir, kum upat deuh hnuah pawh zir belh tur hi a lo la awm zel tih a takin ka hmu. Duhthusam vek ni lo mah se mi puitling zawkah min chher.

"A hmuna inkhel entute khan min duhsak em em a, champion tur khan duhsakna nasa tak min hlan. Khatiang taka thlawpna ṭha kha ka dawng tam lo, an duh ang ka tih hlawhtling ta lo erawh a pawi ka ti," tiin a sawi a, atan chuan hriatreng tur thil a awm.

Miami Masters khelhna kha hard court a nih avangin Djokovic cheṭha kha a mak hran lo, a vanglai pawha a inkhelh thiamna leh hlawhtlin tawhna ṭhin a ni a, tun ṭumah hian hlawhtling lo mah se September a khelh tur US Open atan beisei a la nei ang.

Tunah chuan clay court season an hmang ṭan dawn a, clay bika inelna lian ber French Open chu May thla chawhnu lamah an khel leh ang; chumi hma chuan tournament tenau dangah intuaihriam turin a inlan hmasa leh dawn a ni.