Antony chelh duhtu Isco

Real Betis midfielder Isco chuan loan hmanga an hawh mek Manchester United forward Antony chu an hnenah hun rei zawk cham turin a duh a, club thuenitu lamin chelh ngei se a duh thu a sawi.

Brazilian winger hian Manchester United tan beisei a phak lo, manager thar Ruben Amorim an neih hnuah phei chuan a khel phakm lo; a inkhelh tam theih beiseiin Real Betis hi tun season tawp thleng atan loan hmangin a zawm.

Spanish club tan a theihna a lantir - kumin January mai khan La Liga club hi zawm mah se goal li a khung tawh bakah, a ṭhiante khung tur vawi 12 a siamsak tawh bawk a, a club nghet zawk Man United tana a chet dan nen a inang lo hle.

Isco chuan, "Kan hnena a cham zel theih nan pawisa tam tak a ngai, chumi tur atan chuan a ṭul a nih chuan a thawhkhawm dan pawh kan ngaihtuah mai tur a ni ang, kan hnen a rawn pan hnu hian danglamna tam tak a siam.

"Antony kan neih avangin ka lawm, mihring mihrinna kawngah mi ṭha tak mai a ni a, ama tan chauh ni loin midang an ṭhat theihna turin theihtawp a chhuah takmeuh ṭhin," tiin a sawi.

Real Betis hian Antony an kawl chinah match 12 an khel tawh, heng zinga pahnihah chian hian an tlawm - kar tawp inkhelah khan Sevilla an hneh a, league match bikah phei chuan a zawninh vawi ruk an chak tling ta chiah.

Brazil international hian kum 2022 khan Ajax aṭangin Man United a zawm a, an club player man tam pahnihna a ni hial - a chunga awm chu Paul Pogba chauh a ni; English club tan hian match 96 a khelh aṭangin goal 12 a khungsak.

Khelhna hmun nghet a chang mumal thei lo a, tun season bika Real Betis a zawm hma khan inelna hrang hranga match 33 an khelh zingah vawi 13 chiah a inlan phak, bench aṭanga a luhna a tam bawk avangin player ṭangkai a ni lo.

Mahse, Real Betis tan erawh player ṭangkai berte zinga mi a ni mek - Spanish club hian a hlawh atan kar khatah £100,000 an pe mek, hei hi Antony hlawh pangngai aṭanga chhut chuan a chanve pawh a tling lo a ni.

Club hausak dan a inchen lo a, tun hma khan Real Betis hian Brazil winger Denilson chu pound maktaduai 22-in an lo lei tawh a, an player man tam ber a la ni reng; an tan Antony lei chhuah a harsa dawn a, loan hmanga hawh zel tur pawhin a hlawh pek turah harsatna a thleng thei a ni.