Bayern aṭangin Muller a chhuak dawn

German chanchinbu rintlak SportBild leh Kicker te chuan, tun season tawp hunah Thomas Muller chuan a khelh mekna Bayern Munich a chhuahsan dawn niin an sawi a, thu chiang erawh puan a la ni lo thung.

Chanchinbu mite sawi dan chuan Muller hian season khat dang cham belh leh a duh, mahse German club hian hian kum 35 mi Muller hi contract an zawrh tawh rih lo a, season tawp rualin a chhuak a nih pawhin a mak lo ang.

Muller hian kum 2008 khan Bayern Munich tan a match hmasa ber a khel a, coach Jurgen Klinsmann enkawlna hnuaiah hun hmasa hmang mah se, a hnuah Louis van Gaal enkawlna hnuaiah a theihna tak a pho lang chho thung a ni.

Tun dinhmunah chuan Bavarians player awm loa zingah an club tana inlan tam ber niin, inelna hrang hrangah match 742 a khel tawh a, goal 247 a khungsak tawh bawk.

Bundesliga nomawi 12 teh meuh chawi tawhin, European football inelna sang ber Champions League-ah pawh vawi hnih a champion tawh a, heng bakah hian Super Cup leh Club World Cup pawh a la tawh bawk a ni.

Season kal laiah Bayern Munich hian Bundesliga hma an hruai mek, an chesual viau a nih ngawt loh chuan Bayer Leverkusen lak aṭangin nomawi an chhuhsak ngei hmel a, a vawi 13 nen Muller hi German champion a nih ngei hmel a ni.