Chanmari FC-in Sawmfela an la
I League 2-ah Chanmari FC-in Mizo striker langsar Malsawmfela an lalut a, vawiin tlai dar 4:00 hian Kerala club Sat Tirur an hmachhawn dawn. Mizo club elpui ber Sporting clube de Goa pawhin vawiin tlai dar 3:00 hian Imphal-ah Trau an hmachhawn ang.
Dipankur Sharma hote hian match 13 aṭangin point 29 an hmu a, Sporting clube de Goa aiin point sarihin an hmu tam mek. Mahse, Goan club hi match khatin an khel tlem a, khelh zat inangah point li chauha an inthlauh theih avangin Mizo club tan chetsual a thiang tawh lo.
Tawnhriat ngah Sawmfela
Chanmari FC-in match thum chauh khelh tur an nei tawh mah se I League khelh ngei tumin khelmual chhung leh pawnah tha an thlah lo. Tlarhma tih chak nan Chanmarians hian Sawmfela an lalut a, Mizoram Police tawnhriat leh theihna hi season tawp lam pressure sangah a pawimawh thei ang.
Chanmari hian an forward zinga tawnhriat nei ṭha ber Lalkhawpuimawia chu inhliam vangin an chan a, Kelkang striker hmunruak a zau. Serchhip rawlthar duhawm Lalruatsanga'n mawhphurhna a la a, bench lamah PC Rosangzuala awm bawk mah se tlarhma lam tih chak a ṭul. Sawmfela awm hian Serchhip tlangval Ruatsanga pressure a la kiang thei ang a, Dipankur Sharma tan duh thlan tur player an tam sawt dawn.
Lawma tan hun ṭha
Chanmari FC-in Mizo goalkeeper ṭha pahnih Zothanmawia (T. Mawia) leh RS Lallawmzuala te an lalut a, MPL-ah goalkeeper pahnih an inven chhawk. I League 2-ah erawh T. Mawia chauh a la inlan a, College Veng keeper hi Bengaluru United an hneh ṭuma yellow card vawi hnihna a hmuh avangin Kerala-ah a zin ve lo.
RS Lawma tan a theihna lantirna hun ṭha a inher chhuak a, captain Lalrinchhana Tochhawng hoin tlarhnung venhim hna an thawk dawn. Mizo club hian Sat Tirur an mikhual ṭumin 3-0 in an hneh a, goal an chhuah lo. Tun ṭumah pawh clean sheet a pawimawh ang.
A awlsam dawn lo
Dipankur Sharma hote hian 3-0 ngawtin an mualah Sat Tirur hneh mah se khualmualah chuan a harsa dawn. RG Stadium-a an inkhelh ṭum hian Michael Lalbiaksanga, Paul Ramfangzauva leh Joseph Lalvenhima ten goal an khung a, goal ropui vek a ni.
Tun hnaiah Tlangmawi tlangval Michael-a a khel ṭha tawk lo a, Chanmari goal nawr a nat loh phah. Mizo club hian Paul-a inhliam an tuar bawk a, Kolasib midfielder hi Sat Tirur laka inlan thei tura beisei a ni. Paul leh Michael te an khelh ṭhat chuan Chanmari tan point thum hmuh a harsa lo ang.
A pawimawh
Chanmari hian Sat Tirur bakah Diamond Harbour leh Klasa ta an la hmachhawn dawn. An hnuai chiaha awm Sporting Clube de Goa-in Trau, Neroca, FC Bengaluru leh Sat Tirur te an la hmachhawn dawn a, Goan club hi an chak vek a nih pawhin thil mak a ni lo ang.
Hei vang tak hian tling chiang tura point ruk la mamawh Chanmari FC tan point hloh a thiang tawh lo a, Dipankur Sharma hoten RG Stadium-ah ngei an elpui Diamond Harbour hneha I League tlin an lawm theih nan tun ṭuma an chak hi a pawimawh. Hei chauh hi a ni lo, Mizo club hi an chak vek chuan I League 2 champion a ni dawn.