MSL - A sang pali a chiang

Sharda University Mizoram Super League X-ah semifinal khel tur a chiang ta - Thawhlehni zan inkhelah Chanmari BC an chak a, Saron BC an tlawm bawk. Team pahnih result hian top four a chingfel nghal a, Khatla TBL, Chanmari, Zarkawt BCA leh Zemabawk BC ten semifinal an khel ang.

Chanmari hian Champhai beiseina neih chu tihtawpsakin, 83-77 in an hneh a, top four-ah hmun an 'book' fel a, Aizawl pawn aṭanga MSL khel awmchhun Champhai erawhin season thara MSL khelh chhunzawm turin relegation playoff an hmachhawn a ṭul dawn.

Saron Veng BC pawhin semifinal luh beiseina nei turin chak ngei ngei an mamawh a, mahse, team ṭha Khatla TBL lakah 91-78 ngawta tlawmin, a thiam pali zinga tel an beiseina chu tihtawpin a awm - Khatla erawh league match sarihah an chak vek thung!

Chanmari an vul

Thawhlehni zan inkhelah Chanmari chak zo lo pawh ni se, MSL semifinal khelh theihna chance an la nei tho a, midang result ngaihchan tel a ngai thung - Chanmariin midang kuta innghah buai a ṭul an ti lo a, an dinhmun tur an chingfel.

Chanmari tan Gregoryshon Magee a che ṭha fal nalh a, New Orleans tlangval hi Champhai lamin an chelh ngang lo - vawi 43 point score a nei a, rebound lak ringawt hi vawi 22 a nei thei! Lalnunsanga (12) leh Michael Liansanga (10) ten an pui ṭha bawk a, Moses Zoremmawia erawh a lansarh loh zan a ni.

Champhai tan Dee Franklin a khel ṭha pangngai a, chutihrual chuan point 17 a neih leh rebound 12 a lak chu match dang nena khaikhinin a ropui tawk lo - Samuel Lalramdintluanga (18), Harshwardhan Tomar (14) leh K. Liandinga (14) ten pui ṭha mah se, Gregoryshon Magee an ngam lo a, 83-77 a tlawmin, relegation playoff an khelh a ṭul dawn.

Saron an chuai

Khatla TBL lakah Saron par vul lai a chuai a, season tharah MSL an khelh zel dawn leh dawn loh pawh a chiang ta lo - Thawhlehni zana team pahnih intawn hmain Khatla hi top four ni chiang tawh an ni a, Saron erawhin chak ngei ngei an mamawh thung.

Mahse, tun season-a la tlawm miah lo Khatla meuh chu Saron tan an harsa lutuk hret a, 91-78 in an tlawm. Khatla hian quarter hmasa pathum an la a, Saron harh a tlai hret, tiin a sawi theih. Khatla hian semifinal lut tawh mah se, indahṭha loin Saron an hmachhawn a, Nary James (26), Vanlalṭhazuala (24) leh Emmanuel VL Awmpuia (15) te ho an tal a, Saronin an chelh meuh lo.

Saron tan T.Lalhriatzela bawk langsarin, point 24 score mahse a team chhanhim turin a tawk zo lo a, Frederick Elombi (20) leh Abhisek Tyagi (16) te che ṭha bawk mah se, player ṭha rual nena thawk chhuak Khatla TBL ngam nan a tawk zo lo - relegation playoff an khel dawn.