Brighton-in player thar nei dawn

Nipui transfer inhawn hma hauhin Brighton & Hove Albion chuan player thar an nei dawn tih a chiang der a, Sunderland winger Tom Watson chu pound maktaduai 10 thlenga a man sang chho thei turin nipuiah an la lut ang.

Kum 18 mi winger hian April 2023 khan senior team tana a match hmasa ber a khel ve chauh a, Black Cats tan hian match 17 khel tawhin, goal hnih a khung ve tawh - rawlthar hmabak nei êng tak niin an sawi.

Watson hian Brighton tan kum li chhung khel turin contract a ziak a, June 2029 thleng chu Premier League-ah a khel dawn tihna a ni - England tan Under-17 leh U18-ah a inlan tawh.

Brighton technical director David Weir chuan, "Tommy hi rawlthar hmabak nei êng tak a ni a, hun rei tak chu lakluh tumin kan lo thlithlai tawh. Sunderland tan season duhawm tak a hmang a, nipui huna min zawm hun tur kan nghakhlel tawh hle.

"Tunah erawh a sang thei ang bera season an khar theih nan Sunderland a pui leh phawt dawn a ni," a ti. Premier League club hlun tak ni ṭhin Sunderland hian Championship an khel mek a, 2016-17 kha EPL-a an season hnuhnung ber niin, tunah hian English top flight league-a kir thei dinhmunah an ding mek - table-ah palina an ni a, playoff an khelh ngei a rinawm.