Forest lakah United an tlawm

Premier League aṭanga Champions League khel turin Nottingham Forest chuan kawng dik an zawh a, an kalkawnga hnawk thei tur Manchester United chu 1-0 in an hneh - goal awmchhun hi Anthony Elanga khung a ni.

Tun hma lam ang kha chu ni se la, kai thar team tan Manchester United hmachhawn hi thil zuamawm loh tak a ni ang. Mahse, hmanlai a ni lo a, tunlai a nih miau avangin Forest hian an hlau lo, a tir aṭangin an nawr ngam.

City Ground-ah hriatreng tawh tur goal kan hmu, minute ngana lekah Forest lamin an mikhual hi an vawlet thut a, winger Elanga chuan yard 70 tehmeuha thui ball a tlanpui hnuah goal a khung.

United aṭanga Forest zawmtu Elanga hian chak takin ball a tlanpui, a kawngah Alejandro Garnacho leh Patrick Dorgu te lo awm mah se a paltlang a, a tawpah keeper André Onana tana dan theih lohin a khung a ni.

Nuno Espirito Santo enkawl Forest hian an goal an venghim tluan zui, tunah chuan EPL table-ah pathumna niin palina Chelsea aiin point riat laiin an sang zawk, match khata an khelh tam avangin an inthlauhna erawh a danglam leh thei thung.

Forest hian FA Cup semifinal an lut tawh bawk a, player ṭha tamna Manchester City nen an inhmachhawn ang. Kum 1996 hnua a vawi khat nan European football khelh leh an beisei mek bawk, an tan chuan season ṭha bik a ni mek.

Nuno chuan, "Kan tan chuan goal a ni satliah lo a, min chhandamtu a ni bawk. Mite chuan tuna kan thlen chin leh dinhmun hi an ring phak lo mai thei, mahse ka naute hian beiseina nung an nei a, an huaisen bawk," tiin a naute a fak hle.

Man United erawh Erik ten Hag bana Ruben Amorim an neih hnuah pawh an ropui thei lo, table mawng lamah an talbuai chhunzawm - league table aṭang chuan European football an sawi lang ngam rih lo a ni.

United manager Amorim chuan, "Hun ṭha insiamin ball chang tam mah ila, a tawp dawnah kan tisual zel. Goal khung theihna tura ball pass hnuhnung ber a sual zel a, chuvangin goal kan khung thei lo," tiin khingpuite goal bul hnuaiah an ṭha tawk lo tih a pawm.

Man United hian ball possession 69% an chang a, goal khung tuma vawi 23 an pet zinga paruk chu goal zawnah a kal; mahse hun pawimawh lai takah a hmawr an bawk thei tlat lo.

Bench aṭangin Mason Mount, Rasmus Hojlund leh Christian Eriksen te lut mah se danglamna an siam thei bik lo a, tun season atana an beisei sang ber chu Europa League nomawi a ni tawh ang.