Jokic-a point 61 a tawk lo!

Nimin zing NBA regular season inkhelah Nikola Jokic chuan point 61 tehmeuh mai a nei a, mahse a team Denver Nuggets chakpui nan a tawk zo lo, an khingpui Minnesota Timberwolves lakah 140-139 in an tlawm.

Ball Arena-a inkhelah Nuggets thiampuipa Jokic hian point a neih tam bakah rebound vawi 11 lain a ṭhiante basket neih tur ṭum 10 a siamsak bawk a, a thawhhlawk hle. Anthony Gordon (30 points) chuan a thlawp ṭha hle bawk.

Mahse, Timberwolves lam an ṭangrual ṭha a. overtime an khelh zawh meuh chuan a chungnung zawk an ni. Player paruk ngawtin point 10 chuang an nei thei a, mimal langsar fal nei lo mah se thawhhona ṭha vangin an chak tiin a sawi theih.

Inkhel dangah Golden State Warriors chuan Stephen Curry-a point 52 hmangin Memphis Grizzlies chu 134-125 in an hneh thung. Golden State tan hian Curry bakah point 27 neitu Jimmy Butler III a langsar bawk.

Warriors hi season kal laiah vawi 44 an chak tling ta chiah; Western Conference table-ah pangana niin playoff khel turin an dinhmun a ṭha a, tawnhriat ngah Draymond Green a khelh ṭhat leh ṭhin tak avangin beisei an nei sang bawk ang.