Team tenau lakah Leverkusen chak lo

Bundesliga champion ni lai Bayer Leverkusen chu German Cup semifinal-ah an tla, an hneh loh hi third division club Arminia Bielefeld niin Thawhṭanni zan inkhelah 2-1 in an chak lo.

Schuco Arena-ah mipui 26,601 an pungkhawm a, an tan chuan German champion lo mikhual kha thil hlimawm tak a ni tel ngei ang tih a chiang a, mahse goal an chhuah hmasak avangin an phur lutuk pawh a duai deuh.

Minute 17-naah Jonathan Tah chuan Leverkusen tan goal a khung a, team ṭha leh lian zawk an nih avangin an khung belh nual pawh a rinawm. Mahse, chawlhlawk hmain Marius Worl leh Maximilian Grosser te hmangin an chhanglet a, a tawpah an chak daih.

Xabi Alonso-a'n a enkawl chinah, tun ṭum hi German Cup bikah chuan Leverkusen an chak lohna hmasa ber a ni. Bielefeld zinkawng a ngaihnawm thung - Leverkusen hma hian Union Berlin, Freiburg leh Werder Bremen te an lo hneh tawh bawk a ni.

Bielefeld coach Michel Kniat chuan, "Vanneih vanga chak tiin min sawi ṭhin a, a dik ngei ang. Chutihrualin, kan kalkawnga kan paltlangte chhut chuan ka naute hian theihna sang tak an nei a ni tih hi kan pawm tlan a ngai," tiin a sawi.

Kum 11 an inlan loh hnuah Bielefeld hian kum 2020 khan Bundesliga an khel ve leh hlawl a, mahse kum hnuh hnuah tlhniam leh nghalin, tunah hian third division inelna lamah pawh palina an ni mek.

Bielefeld hian final-ah pawh Bundesliga team tho an hmachhawn dawn, semifinal lehlamah Stuttgart leh RB Leipzig an inhmachhawn thung a, a chak zawk nen nomawi an inchuh leh dawn a ni.