Judgement Night : Ni khat chiah a awm ta; Inkhel en man Rs 100

I League match pawimawh bika Aizawl FC leh Namdhari inkhel en man hi Rs 100 chauh a ni dawn. RG Stadium gallery chung lam thlengin hawn vek a ni dawn a, duhna laiah ṭhut theih a ni ang.

Inkhelh hun hi April 5, Inrinni zan dar 7:00 a ni a, I League kaltlangin football ngainatute tan kartawp hmanna tur ṭha chhawpchhuah a ni. Ticket hi Aizawl FC office, Chanmari bakah a hmunah zawrh chhuah a ni ang.

Aizawl FC hi I League aṭanga relegate thei dinhmunah an ding a, vanduai thlak taka an tla a nih chuan Inrinni zan hi Mizorama I League match hnuhnung ber a ni thei tlat. Mizo mipuite tan hun bik a ni a, hmaih phal chi a ni lo.