Zaninah MSL All Star

Mizorama basketball inelna ngaihhlut hlawh ber, Sharda University Mizoram Super League X-a All Star game chu zanin dar 6:30 hian khelh a ni dawn - R. Dengṭhuama Hall, Mualpui lamah ennawm hmuhnawm en duh tan kal mai tur a ni.

MSL All Star-ah hian tun season MSL-a player langsarte chu team pahnihah ṭhenin an intawng dawn a, Online Mizoram leh Runmawi tiin team pahnih hming hi vuah a ni.

Online Mizoram lam hi Khatla TBL player pawimawh Vanlalṭhazuala captain-na hnuaia khel tur an ni a, Gregoryshon Magee, Dee Franklin, Marquis Cunningham leh Justin Scott Sylver te ho an awm.

Runmawi hi BCA player ṭha Lalnunpuia Renthlei captain-na hnuaiah an khel dawn a, Kenneth J Perkins Jr., Nary James, Abhisek Tyagi, Emmanuel VL Awmpuia leh Lalrina Renthlei te ho awmna a ni - inkhel hmuhnawm beisei a sual lo ang.

MSL All Star-ah hian half time show hmuhnawm tak a awm dawn bawk a, Rebecca Lallawmsangi, Lil Kiki, Michelle Varte leh The Pit star Nghilhruallova te ho an che ang - Slam Dunk inelna a awm dawn bawk a, hei pawh hmuh châkawm tak a ni.

Ticket hi Rs.300, 150 leh 50 man siam a ni a, Rs. 300 man bik hi online-in, triket.in-ah lei theih a ni a, a bak zawng hi a hmunah lei theih a ni ang.