SAFF inkhawmpuiah MFA President

South Asian Football Federation inkhawmpui, SAFF Extraordinary Congress chu nimin khan Colombo, Sri Lanka-a Shangrila Hotel-ah neih a ni a, All India Football Federation aiawhin Mizoram Football Association president Lalnghinglova Hmar a tel.

Khawvela football thuneitute khawmpui lian ber FIFA Congress leh Asia rama football thuneitute khawmpui lian ber AFC Congress-ah Tetea Hmar hian India ram ai a awh tawh a, SAFF inkhawmpuiah hian kum 2021 khan a tel tawh bawk.

He inkhawmpuiah hian Asia Chhim-Chhak ram pasarih - Bangladesh, Bhutan, India, Maldives, Nepal, Pakistan leh Sri Lanka aiawh palaite an tel a, Lalnghinglova Hmar hian India ai a awh a ni.

AFC president Shaikh Salman bin Ebrahim Al Khalifa chuan hmanpuiin, Asia ramin football-ah hma a sawn dawn chuan ram zawng zawngin hma a sawn a ṭul tih a sawi a, SAFF inpumkhatna leh thawhona ṭha a tih thu sawiin duhsakna a hlan.

SAFF inkhawmpui hian an danpui ṭhenkhat an tihdanglam bakah SAFF Championship hrang hrang kalpui dan turte an rel. Inkhawmpui zawh hnu hian MFA President leh AFC President hi a hranpaa inkawmin India ram, a bikin hmar chhakin football lama hma a sawn theihna tura rawtna a neihte Tetea Hmar hian a sawi a, Indian football hrechiang turin India a tlawh leh hunah football tuichilhna hmar chhak state tlawh tel turin a sawm bawk.

Lalnghinglova Hmar hi Asian Football Confederation hnuaia Social Responsibility Committee member a nih mek bakah AIFF Executive Committee Member a ni bawk.