Coach tel loin khel dawn

Aizawl FC-in Shillong Lajong 4-4 a an inhnehtawkpui ṭumin head coach Victor Lalbiakmawia'n tun season-a yellow card vawi hnihna a hmu a, match tawp bera Namdhari nen an inkhelh hunah technical area-ah a ṭhu thei dawn lo. Mission Vengthlang pa Victor hian Lajong bakah hian nikum Churchill Brothers nen khualmuala an inkhelh ṭumin yellow card a hmu tawh bawk.

Victor chuan, "Kan player-te theihna ka hmuh hian relegation zone a awm hi kan phu lo. Tla turin kan in ngai thei lo. Engkim kan kutah a awm a, midangah kan innghat tawh lo bawk a. Chak tumin theihtawp kan chhuah ang," tiin chak ngei a tum thu a sawi.

Aizawl FC head coach chuan sawi chhunzawmin, "Shillong nen chauh khan kan thawkrim lo a, game zawng zawngah chak loh duh loin theihtawp kan chhuah ṭhin. Tunah chuan a kaw tawpah kan ṭang tawh a, khelmualah ngei relegate kan duh lohzia hi kan lantir dawn. Aizawl FC-in I League kan khelh zel theih nan Mizo mipui ṭawiawmna kan sawm a ni," tiin Vanglaini a hrilh.